Vawiinah Governor thar la lut dawn

Mizoram Governor tura ruat Gen.(Dr) Vijay Kumar Singh chuan nimin khan Mizoram a rawn thleng a, vawiinah Mizoram Governor atan lak luh a ni ang.

Nimina Gen. Vijay Kumar Singh rawn thleng hi Lengpui Airport-ah chief minister Lalduhoma, Assembly speaker Lalbiakzama, Home minister K Sapdanga, chief secretary Khilli Ram Meena, DGP Anil Shukla, Assam Rifles 23 Sector commander Brig. Girish Upadhya leh sorkar hotu dangte'n an lo hmuak. Raj Bhavan-ah minister Lalrinpuii, minister of state pahnih Prof. Lalnilawma leh Lalnghinglova Hmar ten an lo hmuak bawk.

Gen. Vijay Kumar Singh hi vawiin chawhma dar 11 hian Raj Bhavan Circular Lawn-ah Mizoram Governor atan lak luh a ni dawn a; Gauhati High Court chief justice Justice Vijay Bishnoi-a'n rinawmna thu a tiamtir ang.

Gen. VK Singh hi Mizoram Governor 25-na tur a ni a, a nupui Bharti Singh-in a rawn ṭawiawm a ni.