Lunglei NGO-te'n HPC tihlen an duh

Lunglei NGO Co-ordination Committee chuan Lunglei High Powered Committee (HPC) ṭhiah tur rawtna awm chu pawmzam chiah an ngai lo a, thuam chak leh tihlen zawk an duh.

Lunglei NGO hruaitute chu January 14, Thawhlehni khan YMA Sub-Headquarters, Lunglei pisaah an ṭhukhawm a; Lunglei HPC ṭhiah tura rawtna awm chungchang an ngaihtuah.

NGO-te chuan, Council of Ministers-in HPC a ṭhiat lo chu lawmawm an tih thu an tarlang a, "Lunglei Municipal Council (LMC) nen khaikhin chi a ni lo, a thuneihna leh a nihphung pawh inang lo tak a ni. HPC zir chiang turte chuan a ṭhiah rawt zawng ni lo, Lunglei district mipui tana a ṭangkai dan ngaihtuahin, a theih ang anga thuam chak dan leh tihlen dan min hmuh chhuahsak zawk se kan duh," an ti.

Lunglei NGO-te hian HPC ṭhiah a nih loh nan hmaichhanah Chief Minister hmuh a, lehkha thehluh an rel a, aikal an tir dawn a; HPC ṭhiah a nih lohna atan zir chiang tur an inruat bawk.

HPC zir chiang zel tura Council of Ministers-in an rêl chu pawmzam chi-ah Lunglei NGO chuan an ngai lo a, ṭhiah rawtna a awm chu pawi an tih thu an tarlang.

Lunglei NGO-te chuan, tun hma aṭanga an aupui tawh, Mizoram chhim lam district pathum enkawl tura Lungleia commissioner puitling dah tih chu remchang hmasaa hmalak chhunzawm atan an dah bawk.