KHAWTHLIR

PWD portal hawng

PWD secretary K Lalthawmmawia chuan nimin khan PWD conference hall-ah online hmanga thil phûm tura kawngpui laih tlang (road cutting) dilna, 'Road Cutting Online Portal for Rural and District Headquarters' (https://pwdroadcutting.mizoram...) a hawng. Portal hi thingtlang leh Aizawl tih loh district khawpuia hman tur a ni a; Aizawl khawpui chhungah chuan kum 2021 aṭang khan hman tawh a ni.

Minister-in tlawh

Land Revenue & Settlement minister B Lalchhanzova chuan nimin khan Aizawl North Settlement Office a tlawh. Minister chuan thawktute chu hawihhâwm taka mipui dawngsawng ṭhin tur leh zahawm taka dâwr ṭhin turin a fuih a, "Aizawl North Office hi duhthusamin peih la ni lo mah se, mipui rawngbawl tur kan nih angin mipuiin kan service an nghak ṭhup a ni tih hre chungin theihtawpa ṭan kan lak a ngai," a ti.

AR leh civil mite'n hun an hmangho

Assam Rifles chuan January 14, Thawhlehni khan Siahaah 'A day with company commander' tih hun an buatsaih a, zirlai 30 leh AR mi leh sa 27 an tel. He hunah hian AR mite leh tualchhung mite inkarah inpawhna leh inṭhian ṭhatna a awm theih nan volleyball khelhho a ni a; infiamna chi dangte pawh neihho a ni bawk.

Hnahthialah training

Hnahthial District Research Office (DRO) bultumin nimin aṭang khan DRO pisaah Annual Training of Registrar of Birth and Death neih a ni a, bawrhsap Rita Lalnunmawii Pachuau-in a hawng. Hnahthial DRO hnuaiah hian Registrar of Birth and Death 35 an awm mek a; training hi vawiinah chhunzawma zawh a ni ang.

Minister-in hawng

Minister PC Vanlalruata chuan nimin khan a bial chhunga Baktawng Village Council House leh Common Service Center building sak thar a hawng. Minister chuan, "CSC hi khawtlang mipuite'n ṭangkai taka an chhawr ngei ka beisei," a ti a; VC inthlan awm turah khawtlang hmasawnna hna thawk turin sorkar thawhpui theih thlang chhuak turin mipui a chah bawk.