Sikul 13 hnenah interactive panel hlan

Samagra Shiksha, Mizoramin Government e Marketplace (GeM) kaltlanga an lei interactive flat panel-te chu nimin khan School Education minister Dr Vanlalthlana'n sikul 13 hnenah a hlan. Minister chuan, zirna kaihhnawihah khawvel technology changkang zel mila kal ve a ṭul thu a sawi.

Interactive flat panel hi sorkar sikul 13 - Chaltlang High School, Hrangchhuana High School, Pianghleia High School, Sihphir High School, KVM High School, Phunchawng RMSA Secondary School, MICE, JL High School, Central High School, Kulikawn High School, Sialsuk Higher Secondary School, Republic Higher Secondary School leh Republic High School hnenah pek a ni.

Dr Vanlalthlana chuan, zirlaite'n hna an zawn hunah tunlai technology nen an inel tawh dawn thu a sawi a, "Zirtirtute pawh zirlaibu bakah tunlai khawvel mila kan inher rem ve zel a ngai a, zirna kaihhnawihah khawvel technology changkang zel mila kal ve a ṭul. Tunlai khawvelah eng nge thleng tih ngaihvena kan inchhiar vàr a, kan hriatna chu zirlaite kan pek chhàwn ve leh a ngai a ni," a ti.

Interactive flat panel chu sorkar hmasa hun laia sem tawh chhunzawmna a nih thu sawiin Education Minister chuan, "Classroom-a zirtirna chu smartboard hmangin audio visual mode-a kalpui theih a lo ni ta a, zirtirtute'n naupangte kan zirtirnaah a tam thei ang ber kan hman ṭangkai a ṭul," a ti a; zirnain hma a sawn theih nan zirtirtute'n lesson plan an siam a ṭul dawn thu a sawi bawk.