National Youth Festival 2025-a telte Sports Minister-in a kâwm

Sports & Youth Services (SYS) minister Lalnghinglova Hmar chuan January 14, Thawh-lehni khan SYS conference hall-ah January 10-12, 2025 chhunga New Delhi-a Viksit Bharat Young Leaders Dialogue, National Youth Festival 2025 neih zawh tâka Mizoram team-a telte a kâwm.

Lalnghinglova Hmar chuan, National Youth Festival chu ṭhalaite tana hmasawnna leh chona phûrawm tak a nih thu sawiin, zirlaite chu thâ thlah loa zirna chhunzawm zel turin a fuih a; central service/Mizoram service-ahte pawh an tawnhriat chu chona ṭha tak a nih a beisei thu a sawi.

Viksit Bharat Young Leaders Dialogue, National Youth Festival hi sorkar laipuiin Vision 2047 tihlawhtling tura programme a duan pakhat a ni a; inelna hrang hrang paltlang hnuah Young Leaders Dialogue-a tel tura India rama ṭhalai thlan chhuah 3,000-te chuan January 10-12 chhung khan Viksit Bharat Youth Festival, New Delhi-ah ram inrêlbâwlna leh hmasawnna atana an ngaihdan leh thil hriatte an sawifiah.

National Youth Festival-a tel tur hian Mizoram aṭangin zirlai 12 thlan an ni a, Dr H Lalzuithangi leh Dr Rosaline Varsangzuali ten an hruai. Mizoram team zinga mi Grace Lalrinpari Hauzel, Pachhunga University Colege chu prime minister Narendra Modi hmaa presentation pe tura thlan zingah a tel a, January 12 khan Prime Minister-in chawchhun a eipui a ni.

Viksit Bharat Youth Festival-a kal Mizoram team hian January 13 khan Aizawlah an rawn let a; nimin khan SYS Minsiter-in kâwmin, thingpui a inpui a ni.