Chhimphei kawng ngaihthahah MNF Ṭhalaite'n sorkar an puh

MNF ṭhalaite chuan thuchhuah siamin, Mizoram sorkarin Chhimphei kawngpui a ngaihthah hle niin an sawiin, mipui zah lohnaa an ngaih thu an tarlang.

MNYF chuan, nimin khan Chhimphei kawng, May 29, 2024-a Remal Cyclone-in a tihchhiatte a hmun an enfiah nia sawiin, "Mizoram sorkar kan hrawn mekin Chhimphei road kawngpui mai ni lo, chhiat tâwkte a ngaithahzia kan hmuhin mipui zah lohnaah kan ngai," an ti.

Cyclone Remal-in kawngpui a tihbalte chu tun thlengin siam a la ni lo nia sawiin MNYF chuan, "Chhiatna lian zawk a thlen leh hma ngeia SASCI project aṭanga central sorkarin sum nuai 13,750 a hmuh tur hi dik takin hmang turin kan phut a, Chhimphei road pawh hi a rang thei ang bera siam turin ZPM sorkar kan phût a ni," an ti a; kawngpui balte chu zin veivâkte leh ZMC pantute tan a him lo niin an sawi.

MNF ṭhalaite chuan, Remal Cyclone vanga chhiat tâwkte Mizoram sorkarin a ṭanpui dan an vil reng dawn thu an tarlang bawk.