NBCC leh LMC hotute'n CM an kâwm

Chief minister Lalduhoma chu nimin khan a pisaah National Buildings Construction Corporation (NBCC) executive director leh Business Development head Pradeep Sharma an inkâwm a; January 14, Thawhlehni khan Lunglei Municipal Council (LMC) hotute nen an inkâwm bawk.

CM Lalduhoma hian NBCC hotu chu Serchhip kiang Mat luia tuikhuah (multipurpose dam) hna thawh dan tur sawipuiin, 3D model an thlirho a; Pradeep Sharma hian India ram hmun danga an hnathawh dante Chief Minister a hrilhfiah.

Sorkar thuchhuah tarlan danin, NBCC hian Mat luiah state sorkar sum sêng loa tuikhuah siam hna thawh theih an inbeisei a; hna thawhna sum hnar (fund source) an lo dap tur thu leh sum an hmuh theih chuan hna thawh chhung a rei loh tur thu an sawi.

Chief Minister hi January 14 khan LMC chairman Lalzuithanga leh vice chairman K Lalrinawma te nen an inkâwm a; LMC-in Finance & Accounts Officer (FAO) an mamawh thu an thlen chu a rang lama hnawh khah an tum tur thu a lo hrilh.

LMC hotute chuan tun hnaia LMC tana sorkarin grant-in-aid cheng nuai 185 a pe chu lawmawm an tih thu an sawi bawk.