KHAWTHLIR

Higher & Technical Education department chuan thuchhuah siamin, Mizoram state quota-a professional course hrang hrang, JEE leh NEET-in a huam lohte zir tur thlanna, State Medical and Technical Entrance Examination 2020 chu September 29, 2020 (Thawhlehni)-ah buatsaih a ni dawn tih an tarlang. Application form thehlut tawhte tan September 21 aṭangin email-ah leh phone number-ah admit card download theihna link thawn a ni ang.

September 14, Thawhṭannia Covid-19 vei hmuh chhuah thar zingah Dr Vanlalchama, Durtlang a tel a; hei vang hian a thawhna Synod Hospital OPD chu nimin khan khâr a ni.

SRH-ZMC Bulletin chuan, tunlaiin ZMC Covid-19 Laboratory-ah swab sample endik tur a tam avangin a hun pangngaiah test result tihchhuah theih a ni lo tih a tarlang a; September 12, Inrinnia sample dawnte chu nimin khan endik zawh tum a nih thu a tarlang bawk.

Aizawl South-II bialtu MLA Lalchhuanthanga chuan nimin khan a bial chhunga Venghnuai Local Task Force hnenah buhfai ip panga, alu ip pakhat, hand sanitiser litre 5 leh tél litre 96 a pe a; home quarantine lai a nih avangin a aiawhin ZPM Block hruaitute’n an hlàn a ni.

Mizoram Taxi Association chuan thuchhuah siamin, tanklorry khalhtu Mizo kut thlak a, an motor tihchhiatsaktute chu a rang thei ang bera man chhuak a, hremna pek ngei an phût thu tarlangin, “NH-54 kawngpui an duh hun huna an lo dang ve leh ngawt ṭhin hi ṭha kan ti loa, kan sorkar hian hma la rawh se,” an ti.

State Referral Hospital (ZMC)-ah nimin khan Covid-19 vei mi 14 leh veia rinhlelh mi pathum dah luh an ni. SRH-ZMC Bulletin tarlan danin, SRH-ah hripui vei vangin mi 102 enkawl mek an ni a, ICU leh SICU-ah pakhat ve ve awmin, mi dang zawng chu Isolation ward-ah an awm. ICU-a awmin hma a sawn zel a, SICU leh ward-a awmte’n harsatna lian tham an nei lo.