Police-in ILP dik lo Neitu mi 117 an man

Aizawla police station hrang hrangte chuan August 10, 2016 khan Aizawlah hnam dang ILP nei lo leh pek an nih anga hmang lote zawn chhuah beihpui an thlak a; ILP nei lo, thi tawh leh hmang dik lo hnam dang 117 an man.

Police thuchhuah tarlan danin, ILP nei lo leh bawhchhia an mante chu - Aizawl Police Station hnuaiah mi 37, Bawngkawn Police Station hnuaiah mi 28, Vaivakawn Police Station hnuaiah mi 29 leh Kulikawn Police Station hnuaiah mi 23 an ni.

Hnam dang an mante hi Court-ah hruai an ni a, Court-in an rama thawn lêt tura a tih mi 47 chu police motor hmangin Mizoram ramri thleng dah turin nimin tlai khan thawn let an ni.

Police thuchhuah chuan, hnam dang hna thawka chhawr ṭhinte chu anmahni sponsor ngei emaw, ILP felfai nei chauh chhawr turin an ngen a, "ILP nei pawhin an neih chhan hna chauh an thawk thiang tih hre tlang vek ila. Kan mi chhawrte ILP a hun taka tinung turin kan inchah nawn a ni," an ti.

Police-te chuan, ILP chu an enfiah fo dawn tih an sawi a; Mizo mipuite chu police-in ILP dik lo hnam dang an mante sawi chhuahsak tum buai ngai loa permit dik, felfai nei chauh chhawr turin an ngen.