Siaha Anti-Drugs Campaign hawng Siaha dist-ah ruihhlo vangin 45 thi

Nimin khan Siaha SP pisa bultumin Siaha DC conference hall-ah 'Siaha Anti-Drugs Campaign' hawnna inkhawm neih a ni a; MADC chief executive member RT Zachono khuallian a ni. He hunah hian, kuminah Siaha district-ah ruihhlo vangin mi 45 an thi tawh tih an tarlang.

Campaign hawnna in-khawm-ah hian Siaha DC Harleen Kaur, SP Shank Dhar Mishra, Excise & Narcotics superintendent R Laldinsanga te, sorkar pisaa hotu te, V/C member te, MTP leh MChP hruaitute leh chanchinbu mite an tel. Anti Drugs Campaign leh a kaihhnuai thilah zawhna leh chhanna hun hman nghal a ni.

Excise & Narcotics superintendent R Laldinsanga sawi danin, Siaha district-ah hian kum 1984-ah ruihhlo vanga thi an awm ṭan a, kum 1984-ah hian ruihhlo vangin mi pahnih an thi. Ruihhlo vanga thi an tam ber kum 2004-ah mi 143 an thi a, mipa 122 leh hmeichhia 21 an ni. Kumin 2016 bikah, August 10 thlengin ruihhlo vanga thi mi 45 awmin, mipa 37 leh hmeichhia pariat an ni.

Siaha district-a Anti Drugs Campaign hi ṭhuang hniha kalpui tum a ni a; a
ṭhuang khatnaah 'Ruihhlo lak luh danchah' tih leh ṭhuang hnihnaah 'Ruihhlo hmanna/hralhna tihrêm' tihte kalpui a ni ang.

Ruihhlo dona kawnga chak zawka hmalak a nih theih nan tlawmngai pawl te, VDP te, Excise & Narcotics department leh Police department-te
ṭangkawpin Joint Action Committee din tum a ni a; sikul leh college-ah awareness campaign neih ṭhin tum a nih bakah, pamphlet leh ruihhlo hlauhawm zualte hnathawh dan ziahna compendium sem tum a ni bawk.