DC-in rel kawng siam mek a tlawh

Kolasib DC H Lalengmawia leh Kolasib district-a sorkar hotu dangte chuan, August 10, 2016 khan Bairabi-Sairang rél kawng siam meka lei verhna hmun a tlawh.

Kum 2019-ah rél kawngin Sairang a thlen theihna turin harsatna awmte a theih anga chin-felsak zel a tum thu a sawi.

H Lalengmawia chuan, Mizoram hma-sawnna tura North East Frontier Railways hnuaia thawktute'n hna an thawhnaah harsatna nei loa an thawh theih avanga lawmthu sawiin, Kolasib district chhunga hma an laknaah hatsatna hrang hrang an neihte chu a theih ang anga chinfel zel an tum thu a hrilh a ni.

Kolasib DC-in a tlawhna hmun hi Kawnpui Darnam rama Sushee Infra. & Mining Ltd.-in hna an thawhna hmunah a ni a; DC-in a tlawh lai hian lei verh (tunnel) pakhat, metre 248.50 a sei chu a indáidanna bomb hmanga tichhiain an verh tlang a ni.

Sushee Infra. & Mining hotute chuan, Bairabi leh Sairang inkarah lei verh ngai hmun 23-ah a awm tih sawiin, chu'ng zinga pakuate chu an verh tur a ni a; kumin September thlaah tunnel pakhat, Khamranga mi chu zawh theih an beisei thu an sawi.

Tunnel verh tur 23 zingah hian July thla khan Coastal Constructions chan zinga pakhat leh SSNR company chan zinga pakhat chu verh zawh a lo ni tawh bawk.

Bairabi-Sairang rêl kawng siam hna hi kum 2019-a zawh tura tih a ni a; chak taka hmalak mek niin, chawlhkar tin India Prime Minister Office-ah hnathawh dan report an pe ziah a ni.