KHAWTHLIR

Thisen pe

Aizawl West College chuan, nimin khan an college-ah blood donation camp an huaihawt a, Aizawl Civil Hospital tan mipa 79 leh hmeichhia 21 ten thisen unit 100 an pe.

Centre hawng

Higher & Technical Education minister R Romawia chuan, nimin khan Aizawl West College-ah NIELIT Study Centre a hawng. NIELIT Study Centre tharah hian college zirlaite'n sum tlémtê chawiin computer course, Certificate in Computer Concept an zir thei dawn a ni. Aizawl West College-ah hian zirlai 942 leh zirtirtu 38 an awm mek.

Pisa rawk tum man

Central YMA pisa, Tuikhuahtlanga mi chu Nilaini zan zanlai pelh hnu, dar 1:30 vel khan kawngkhârpui kar chhiaa rawk tum a ni a; rawk tumtu thawm hi pisa bul awm chowkidar-te'n hriain an luhchilh a, an man hnuah police hnenah an hlân. CYMA pisa rawk tumtu hi Lalmuanpuia s/o Chhiarkungi, Mission Veng YMA North Branch huam chhunga cheng a ni a, SRS-te pawhin ruihhlo vangin an lo man fo tawh a ni.

Rângva sem

MLA RL Pianmawia chuan, August 10, 2016 khan Darlawna BDO pisaah rangva a sem. Rangva hi Rural Housing Scheme hnuaia sem niin, mi 30 hnenah bundle li zela pek a ni a, bundle li chu Rs. 15,312 man a ni. A dawngtute'n Rs. 1,531 an chawi ve thung.

Party pahnihin Candidate nei

Aizawla local council pathuma August 26, 2016-a bye-election neih turah Congress leh MNF-te chiahin candidate an siam a, party dangin candidate an dah lo. Chhinga Veng, Chite leh Mission Venga LC bye-election turah hian nimin khan hming pe lutte inhnuhdawh theih ni hnuhnung a ni a, inhnûkdâwk an awm lo. Chhinga Veng leh Chite Veng chu general seat a ni a, Mission Vengah hmei-chhia thlan tur a ni thung. Candidate-te chu nimin khan an party symbol pangngai pek an ni.