MIMER atan Steering Committee din rél

Chief minister Lal Thanhawla kaihhruaiin, nimin khan Chief Minister’s Office conference hall-ah Mizoram Institute of Medical Education & Research (MIMER) leh New Economic Development Policy hnuaia health sector tihchangtlunna chungchang sawiho a ni.

MIMER dinna turah chak tak hmalak a nih theih nan Planning & Programme Implementation Secretary kaihhruai Steering Committee din an rel.

CM Lal Thanhawla chuan, sorkarin Mizoramah medical college din ṭha a ti a, a puitlin theih nan theihtawp chhuah mek a nih thu a sawi a, "Medical college dinna tur ruangám leh hmanruate chu Central funding aṭanga tih tur ni mah se, thawktute hlawh leh inenkawlna chu state sorkarin a ruahman a ngai dawn a, sum leh pai mamawhna a tam dawn. Sorkar chuan medical college ṭha tak din a duh avangin uluk leh zau taka ngaihtuah a, hmalaknate thlirho fo a ngai a ni," a ti.

Health minister Lal Thanzara chuan, medical college dinna atan hian hmabak a la tam thu leh a theih anga chaka hmalak a nih thu a sawi bawk.

Meeting-ah hian MIMER dinna tura nodal officer Dr Jane Ralte-in MIMER dinna tura hmalak tawhna te, sum leh pai ngai zat turte leh hmachhawp dangte a sawifiah.

Health secretary Lalrinliana Fanai chuan, Indo Global Health Consortium (IGHC) nen hriselna leh health sector tihchangtlunna atana thawhho dan tura Health deapartment hmalak dan leh inbiakna an neih dante a sawi a; IGHC hotute chu Aizawlah an rawn zin thuai tur thu a sawi.

Hospital & Medical Education joint director Dr T Lalhmangaihi'n NEDP kaltlanga Aizawl Civil Hospital leh Lunglei Civil Hospital bakah, district hospital zawng tihchangtlunna atan leh MIMER dinna atana State Referral Hospital, Falkawn tihchangtlunna tura ruahmannate a tarlang.

Mizoram College of Nursing principal Lalchhanhimi'n IGHC nena thawkhoa nurse zir zote tan ram danga hna an hmuh theih nana ruahmanna an siam tawhte a sawifiah bawk.

Meeting chuan Medical College dinna atana thil ṭulte procedural matters chungchangah chak taka hmalak a nih theih nan Planning & Programme Implementation Secretary kaihhruaina hnuaiah Steering Committee din ṭha tiin he Committee-ah hian Finance, DP&AR leh Health & Family Welfare Department aiawhte chu telh nise an ti a. Health Deapartment pawhin Road Map changtlung zawk siam se tiin an rel bawk.

Meeting-ah Finance minister Lalsawta, Health minister Lal Thanzara, Health Secretary, Planning Secretary, Finance leh Health department hotute an tel.

MIMER din tum hi Central scheme a ni a, ‘Scheme for Establishment of new Medical Colleges by upgrading District/Referral Hospital’ hnuaia kalpui tur a ni. He ruahmanna hnuaiah hian India ram pumah medical college thar 58 din tum a ni a; medical college dinna atana senso 90% chu sorkar laipui tum tur niin, 10% chu state sorkar tum tur a ni thung. MIMER dinna atana sum mamawh zat chu cheng vbc. 189 vel a ni.