CM-in bank ṭhenkhat a zilh

Chief minister Lalduhoma chuan, Mizorama bank ṭhenkhat credit deposit (CD) ratio hniam lutuk chu Mizoram mipui zah lohna a tlinga a hriat thu a sawi a; ṭang lehzual turin Mizorama bank-te a chah.

January 15, Nilainia Aijal Club-a Special State Level Bankers' Committee Mizoram for the quarter ended September, 2024-ah thu sawiin Chief Minister chuan, Mizorama bank ṭhenkhat chu CD ratio-ah hma an sawn avanga a lawm thu a sawi a; chutih rualin, bank ṭhenkhat CD ratio hniam leh lutuk chu fel lo a tih thu a sawi a ni.

CM Lalduhoma chuan, Mizorama bank zingah CD ratio 40% aia hniam eng emaw zat an la awm tih sawiin, "Hei hi chu a fel loin kan hria. Bank ṭhenkhat phei chuan 20% pawh in phak lo. Kan ram aṭangin deposit in dawng khawm a, chuta ṭanga 20% vel kan ramah in pûk chhuahtir a, a dang 80% vel state dangah in pûk chhuahtir tihna a ni a, hei hi Mizo mipuite zah lohna a tlingin ka hria," a ti.

Chief Minister chuan, "Sum dawn nan chauha min rawn hmang bank hi kan mamawh lem lo. Hmasawnna hna min thawhpuitu tur kan duh. SLBC (State Level Bankers' Committee) awm leh huna hmasawnna report kan hmuh loh phei chuan ngawih ral kan tum lo. Kan ká kan àn chuan dawrtu nei lo bank in ni ve dêr thei a ni," a ti a; Yes Bank, Bandhan Bank, Axis Bank, ICICI, HDFC, Central Bank of India, Federal Bank leh NESFB-te chu ṭang zual turin a chah.

Priority sector lamah inthlahdah lo tura bank hotute chahin Lalduhoma chuan, "Sorkarin mirethei zawkte khai chhuah tumin agriculture & allied sector-ah te, MSME lamahte thapui thawhin hma kan la chho dawn a, bank-te hi kan thawhpui pawimawh ber zinga mi in ni. Staff indaih lohna kawngah pawh harsatna in tawh loh nan hma lo la ṭheuh turin ka ngen che u a ni," a ti.

Chief Minister chuan, Mizoramah bank eng emaw zat awm ve tawh mah se, a tam zawk chu Aizawl leh district capital-a inbun an nih avangin, hmun kilkhâwr zawkahte pawh inzar pharh zel turin bank hotute a chah bawk.

Meeting-ah hian SLBC ṭhutkhawm hnuhnung bera rorel bawhzuina report te, bank hrang hrangte deposit leh advances (loan pek chhuah) dinhmun te, sorkar ngaih pawimawh bik sector hrang hranga annual credit plan (ACP) dinhmunte thlirho a ni. Financial inclusion lama hmalakna te, RSETI lama hmalakna te, aspirational district & block chhunga hmalak dan te, Mizorama large currency chest neih ve chungchang leh African Swine Fever lam hawi hmalaknate sawiho a ni bawk.

Ṭhutkhawmah hian adviser to CM pahnih TBC Lalvenchhunga leh Dr KC Lalmalsawmzauva, chief secretary Khilli Ram Meena leh sorkar mi pawimawh dangte leh Mizorama bank hotute an tel a ni.