KHAWTHLIR

Thisen pe

St. Peter's Higher Secondary School NSS chuan January 15, Nilaini khan Serchhip District Hospital-ah thisen unit 11 an pe a, petute mipa pasarih leh hmeichhia pali an ni.

Meizial man

Assam Rifles-te chuan January 13, 2025 khan Champhai Jail Vengah ram dang meizial báwmpui (case) 29 leh báwm (carton) 25 an man a, Champhaia Customs Preventive Force hnenah an hlan. Foreign cigarette man hi cheng nuai 38.83 hû a nih thu an tarlang.

CRS project sawiho

Saitual bawrhsap Dr Lalngura Tlau hoin nimin khan a pisaah bialtu MLA hmalaknaa Saitual district-a CSR project hnuaia Health department leh Livelihood sector-a hmalakna tur hrang hrang ruahmante sawiho a ni. Ṭhutkhawmah hian sorkar hotute leh joint YMA hruaitute bakah, Mission Foundation hotute an tel.

DIG (SR)-in tlawh

Mizoram Police deputy inspector general (southern range) Altaf Ahmad Khan chuan nimin khan Lunglei Luangmuala 2nd Battalion MAP Headquarters a tlawh. DIG hi 2nd MAP Commandant leh officer dangte nen an inkâwm a, batallion hmunhma hrang hrang a fang bawk. Altaf Ahmad Khan chuan, 2nd MAP-te Charity puala Rs 2,00,000 chuanga an luang chhuak chu ropui a tih thu leh chhunzawm zel tura a duh thu a sawi.

Kawng khâr dawn

Durtlang leh Kawnpui inkar kawng siam hna thawh mek chu chak lehzuala thawh a nih theih nan Kolasib additional SP C Lalsawta chuan January 16, 2025 aṭangin zing dar 9 aṭanga tlai dar 4 thleng kawng khâr a nih dawn thu a puang. Tlai dar 4 aṭanga a tûk zing dar 9 thleng kawng hawn a ni dawn a, kawng hawn chhungin MMV leh a aia tête chauh tlan phal a ni a, lirthei lian (HMV) chu Sairang lam kawngah tlan tur a ni. Thupek zawm lote chu MV Act hmanga hrem an ni dawn a; thuchhuah chungchanga harsatna tawk emaw, report nei emawte chuan Kawnpui Police Station officer-in-charge phone number 8794723770-ah biak theih reng a ni.