MRB-in Swachhata Pakhwada an hmang

Mizoram Rural Bank chuan sorkar laipuiin January 16-31, 2025 chhunga faina chungchang inzirtirna a kalpui tur Swachhata Pakhwada pualin nimin zing khan Aizawlah Awareness Rally an huaihawt.

Awareness Rally-ah hian Aizawla MRB-a thawkte bakah, branch hrang hrang aiawhte an tel a; MRB general manager Saibal Kanti Roy chuan faina pawimawhna sawiin, vantlang hmunte tihfai leh hnathawhna hmunte vawn fai kawngah ṭan la thar lehzual turin a chah.

Rally-ah hian faina chungchang inzirtirna bakah, tunlaia bank kaltlanga inbumna tam lutuk laka invenna tur thuziak vantlang mipui hnenah an sem a ni.

MRB hian Save the Riparians nena thawkhoin Swachhata Hi Seva 4.0 Campaign-ah Aizawl By-Pass Road-a bawlhhlawhte an lo tifai tawh a; vawiin hian STR Phase-III ṭan an tum a, Chite lei aṭanga Trinity Hospital thlengin Aizawl By-Pass Road dunga bawlhhlawhte an tihfai dawn a ni.

Swachhata Pakhwada hi Mizoram khaw hrang hranga MRB branch thlan bikte'n an hmang chhunzawm dawn a, vantlang hmun tihfaite, faina inzirna mipuite hnena pekte leh thutiam neihpuitein hun an hmang ang.