Kumina Chapchar Kût thupui atan 'Zo nun ze mawi - Hawihhâwmna' thlang

Chapchar Kût 2025 Organising Committee chu an chairman Lalduhoma, chief minister hoin nimin khan CMO conference hall-ah an ṭhu a; kumin Chapchar Kût thupui atan 'Zo nun ze mawi - Hawihhâwmna' tih an thlang.

Ṭhutkhawmah hian kumina Chapchar Kût chu March 3-7, 2025 chhunga lawm turin rêl a ni a; Aizawlah chuan March 6-7 chhungin Lammualah hman tur a ni. Ni hmasa zawk March 6-ah Home minister K Sapdanga hoin hman a ni ang a, March 7-ah chief minister Lalduhoma'n a hmanpui ang.

Chapchar Kût hlawhtlin theihna tur atana mawhphurtu turte ruat niin, sum senso turte bithliah a ni. Kum dangah chuan Chapchar Kut hmanna tur sum a hranin budget-ah dah a ni ngai lo a, kuminah erawh chuan sorkar budget-ah cheng nuai 100 dah a ni.

Kût hmanna tura budget-a sum dah hian mamawh zawng zawng a daih dawn loh avangin sum hmuh belh theihna tur dangte nimina ṭhutkhawmah hian sawiho a ni bawk.

CHAPCHAR KÛT HMAN DAN TUR TLANGPUI

▶ March 3-ah Kût pual tlân buatsaih a ni ang.

▶ March 4-ah Flower Show leh Painting Exhibition kalpui ṭan a ni ang.

▶ March 5-ah Chapchar Kût Heritage Tour buatsaih a ni ang.

▶ March 5-ah vek hian Falkawn Zokhuaah Mizo pi leh pute nun (Mizo typical life) entir/lantirna (demonstration) buatsaih ṭan a ni ang a; handloom, textile & handicraft exhibition leh food processing & food court-te hawn ṭan a ni ang.

▶ Mizo typical life demonstration hi March 6-ah chhunzawm tur a ni a; exhibition leh food court-in March 7 thleng a awh ang.