Naupiang leh mitthi chhinchhiahtu training

Nimin khan Serchhip leh Saitualah naupiang leh mitthi chhinchhiahtu (Registrar of Birth & Deaths) te tan training buatsaih a ni.

Serchhipah chuan training hi DRO conference hall-ah buatsaih a ni a, training hawngtu Serchhip DC Paul L Khuma chuan hmangaihna leh chhan neia hna kan thawh chuan Pathian leh kan mihringpui te nen inzawmna tha kan nei ṭhin tih sawiin, Birth & Death Registrar hna chu an hna pui ber ni lo, an hna peng mai mah ni se hmangaihna nen hlut taka thawk turin a fuih.

Paul L Khuma chuan data hlutna leh Register of Birth & Death Registrar hna pawimawhna sawiin, "Nausen piang thar lo chhinchhiah hi khua leh tui an nihna anga an dikna chanvo an neih theihna hmasa ber a ni. Data felfai tak chuan hmasawnna hna thawh tur duan chhuahna kawngah a pui a, electoral roll dik leh felfai neih theihna atan a pawimawh," a ti.

Saitualah chuan training hi Chawnpui Branch YMA Hall-ah neih a ni a, an hun hmanpuitu Saitual DC Dr Lalngura Tlau chuan, "Inchhiarna hi sorkarin a ngai pawimawh telh telh a, kan pian pun dan leh thih dan chhinchhiah fel chu ram hmasawna hnathawh nan thil pawimawh tak a ni. Chuvangin RBD te chu ram hmasawnna inghahna, a bul thut leh kailawn an ni," a ti a, an hriat sa bakah thil thar an zir turte pawh ṭha taka zir turin a chah.

Training-a tarlan a nih danin, February 2025 aṭang hian kutziak certificate pek chhuah tawh loh tur a ni a, digitized certificate chauh pek chhuah tawh tur a ni dawn.