Sorkarin Kelkangah tanpuina sem tan

Mizoram sorkar chuan Kel­kang khuaa chhungkaw 237-te chu tuizem a sem vek dawn a, Inrinni khan an sem ṭan a; an eizawnna tur chi hrang siamsak turin ruahmanna an siam fel.

Home minister R Lalzir­liana chuan June 19, 2015 khan Kelkang a tlawh a, khaw­tlang hruaitute nen an inkâwm. Home Minister-in Kelkang mipuite chhawmdawl dan tur a sawipuinaah hian Champhai DC H Lalengmawia leh chhawmdawlna tura a kaihhnawih sorkar department hrang hrang hotute'n an ṭawiawm.

Home Minister chuan, Kelkang chu Mizoram tan hmun pawimawhah a chang tawh nia sawiin, "Khaw mipuite leh harh tharna chhimtute'n an mamawhte phuhru turin sorkarin a inhuam zau hle a ni," a ti. Sorkarin ṭanpuina a pek turte chu chak taka kalpui a nih theih nan sorkar lama mawh latu department-te leh khawtlang hruaitute an thawhho ṭhat a ṭul thu sawiin, Kelkang khawtlang chhawmdawlna tura tih tur ṭulte chu July 2015 chhunga peih fel hman vek beisei a nih thu a sawi.

Champhai DC chuan, chhungkaw eng emaw zatte tana ar leh vawk vulh tur sem tur chu thlawhhma la hlei thei lo leh mahni eizawnna kawng zawh thei loa awmte intunnunna tura bul ṭanna tur a nih thu a sawi a; ar leh vawk vulh tur an pekte chu vulh puitlin hnua tihral vek a nih loh nan mipuite hrilhhre turin khawtlang hruaitute a chah.

Sorkar ruahman dan chuan, Kelkangah hian chhungkua 237 an awm a, chhungkaw tin hnenah tuizem litre 2,000 dawng pek tur niin, Inrinni khan sem ṭan a ni. Chhungkaw pariat hnenah eichawp dâwr (petty trade) siamna pek a ni dawn a; chhungkaw 13 hnenah ar 50 ṭheuh, chhungkaw 216 hnenah vawktê pahnih ṭheuh pek a nih dawn bakah, ar in chung tur rangva bundle khat leh vawk in chung tur rangva bundle chanve pek an ni dawn.

Swach Bharat Abhyan hnuai­ah vangtlang inthiarna tur êk-in unit 200 pek a ni dawn a, êk-in khat tawh paih ruak turin lirthei ruahman a nih bakah, a paihna hmun tur pawh ruahman fel a ni.

Kelkang leh Dilkawn inkarah bawlhhlawh paihna tur hmun thlan tawh a ni a; kawlphetha pek belhna (LT line extension) siam a ni ang. Dilkawn leh kelkang inkara tuikhur chei tum a nih bakah, Champhai aṭanga tui pek tum a ni bawk.