Aizawl Venglaiah in a chim

Ruahsûr nasa vangin June 20, 2015 zing khawvar hma, dar 3:30 vel khan Aizawl Venglaia H Ramtiama in, Assam type chu a ban chhak lam innghahna lungrem a tawlh vangin a tlu a, a thlanga Saithangpuii in leh Saliani in a delh chhe bawk. Mihring thi leh hliam erawh an awm lo.

Thu dawn danin, H Ramtiama-te chhungkua hi an in a derthâwng tih hriain Zirtawpni zan khan an riak chhuak a, an riah chhuah hlanin in ban chhak lama lei tawlh leh lungrem chimin a chimpui ta a ni.

Inrinni khan in tlu leh a delh chhiatte châk leh bungraw senghawi hnatlang neih a ni a, veng mipuite bakah State Disaster Response Force mite leh veng ṭhenawmte aṭangin mi ṭhahnem tak an thawk chhuak bawk.