KHAWTHLIR

22nd June, 2015

Thisen pe
ṬKP Coordination Aizawl East bial chuan Inrinni khan Aizawl Civil Hospital-ah thisen unit 75 an pe a, a petute mipa 61 leh hmeichhia 14 a ni. Dawrpui branch YMA pawhin Aizawl Civil Hospital-ah thisen unit 32 an pe a, a petute mipa 30 leh hmeichhia pahnih an ni. Evangelical Church of Maraland, New Saiha pastor bial KTP chuan Inrinni khan Saiha District Hospital-ah thisen unit 35 an pe a, a petute mipa 29 leh hmeichhia paruk an ni.

RV-ah lei min leh
Inrinni tlaia ruahsur lai khan Rangvamual tawntirha kawng chhaka lei min ṭhin chu a min nawn leh a, NH-54, Aizawl-Sairang kawngpui a hnawh ping. Leimin hi nimin khan thenfai hna thawh a ni a, tlai lamah lirthei kal tlang theiha thenfai a nia thu dawn a ni.

In atangin zuangthla
Inrinni tlai khan Ṭhuampui Vengah in chhawng ngana aṭangin pa pakhat, Bikram (Nepali) chu a zuang thla a, ká chhawn lohin a thi nghal.

Transfer duh lo
MSU sub-headquarters, Vanbawng chuan thuchhuah siamin, June 18, 2015-a Vanbawng High School zirtirtu F Ropekhlua hmun danga sawn a ni chu an hriatthiam loh thu an tarlang a; transfer order chu sût turin sorkar an ngen.

UPC leh vaihlo do
UPC(NEI) Aizawl East District chuan June 20, 2015 khan Bethlehem Veng biak-inah vaihlo ṭhat lohzia inzirtirna an buatsaih. ISTH(Mizoram) president Lal Riliani'n thu a sawi a, Mizoram State Tobacco Control Society-a nodal officer Dr Jane Ralte-in 'Ruihhlo hlauhawmzia leh a sim theih dan' tih thupui a sawi.

Gypsy chesualah mi 2 thi
June 20 chawhnu dar 2:30 vel khan Bungbangla bulah gypsy MZ-01 F-4529 chesualin, kawng thlangah a tlan liam a, motor-a chuang mi panga zinga pahnih an thi a, mi dang pathum an hliam. Police-te hnen aṭanga thu dawn danin, gypsy chesuala thite hi Ama Chandra (27), Chaltlang Mualveng leh Govinda Karki (20), Hunthar Vengte an ni. Hliamte chu damdawi-inah lak an ni a, ngaihtuahawm lutuk an ni loa thu dawn a ni.