Airport atan Saiha Dist-a New Latawh ram enfiah

GAD Civil Aviation Wing-a prin­­cipal consultant Wg.Cdr. Lal­zawma chuan, June 20 khan Saiha district-a New Latawh ram, Tlangpuiah airport siam theih a nih leh nih loh enfiah (aerial survey) a nih thu a sawi.

Wg.Cdr. Lalzawma sawi danin, he ram en chu Saiha bialtu MLA Dr K Beichhua'n Chief Minister hnena Greenfield Airport siam tura rawtna a thlen bawhzuia enfiah a ni a; New Latawh Tlangpui chu ramngaw chhah tak a nih avangin aerial survey aṭang ringawt chuan a zir chian theih loh avangin, ground survey nei turin Saiha DC an hriattir.

Boeing 737 thlawhtheihna lian ṭumna turin runway metre 2,500 (km 2.5)-a thui leh metre 300 tala zau a ngai a, thlawhtheihna parking area (apron) metre 120-a thui leh metre 90 vela zau a ngai. Thlawhna tê chi, ATR-42 tan runway metre 1,400-a thui leh metre 150 tala zau a ngai a, Apron metre 90-a thui leh metre 80-a zau a ngai bawk.