Revolutionary Democratic Party din a ni

June 20, 2015 khan Aizawlah political party thar - Revolutionary Democratic Party (RDP) a ding a, The Grand Hotel-ah party thar puan chhuahna inkhawm neih a ni.

RDP-ah hian president chu Robert Hrangdawla, IAS (rtd.) a ni a, vice president chu Hming­than­zami (AMC councillor) niin, general secretary-te chu C Lalthanmawia leh Vanlalhruaia-te an ni. An party flag-ah puan eng (yellow)-ah buh vûi lem chuang an hmang.

Robert Hrangdawla chuan, party thar an din thu puangin, an thupui chu, 'Ram hi Lalpa ta a ni - huai takin awm la, ti mai rawh' tih a nih thu a sawi a; an innghahnate chu - mipui rorelna, democracy dik, ram leh hnam humhalh tih leh Zofate insuihkhawm leh inpumkhatna tihte a nih thu leh, thil tum 11 an neih thu a sawi.

Hmingthanzami chuan, party thar an din chhan chu ram leh hnam himna an ngaih pawimawh vang a nih thu a sawi a, "Congress sorkar mipuiin an ning tawh a, MNF party pawh sorkar tlakah an ngai tawh lo. Chuvang chuan party thar kan din a, RDP hi mipuite beisei angin a kal dawn a ni," a ti.