AMC sum nuai 1,808.37 hrèn mek Hmang tawh angin Central hriattir

Mizoram sorkar chuan sorkar laipuiin Aizawl Municipal Council (AMC) sum tur a rawn pek nuai 1,808.37 a hréng mek a, K-Deposit-ah dah a ni. Hetih lai hian, AMC chuan sumte chu a taka an dawn theih nan leh sorkar kum thar kai a ngaih avangin hmang tawh angin Central-ah utilisation certificate (UC) an thehlut.

Thudawn danin 13th Finance Commission chhunga hna thawh ṭhat vanga AMC hnena Central-in sum a pek, second instalment nuai 490.44 chu Finance department-in a la pe chhuak lo a, a hréng mek a ni.

Central aṭanga AMC sum tur lo kal, Mizoram sorkarin AMC hnena a pek tlai ṭhin vanga sum a chawi chu AMC-a pek a nih hnuah hmasawnna hna thawhna atan ṭangkai taka hman a nih thu, AMC hotute chuan an sawi a, "Ṭangkai taka hman ṭhin ni mah se, hmasawnna hnathawh erawh a muan phah," an ti.

AMC hotute chuan, AMC-in General Performance Grant (GPG) a dawn chu UD&PA-in hna a thawh ṭhat vang a ni ber tih sawiin, kum 2013-14 chhunga hna thawh ṭhat lawmman second instalment sum an dawn nuai 490.44 chu March 3, 2015-ah Central-in a rawn pe a, financial year a tawp dawn avangin Mizoram sorkarin K-Deposit-ah a dah niin an sawi.

Sum chu a takah hmang lo mah se, Central-ah utilisation certificate an thehlut tih sawiin, AMC hotute chuan, "Sorkar kum thar kaipui a nih chuan kum thara mi a sawh hêk dawn vang te, 13th Finance Commission hun a liam dawn tawh vang leh, April 2015 aṭang chuan 14th Finance Commission hun a nih tawh dawn avangin sumte hi a liam (lapse) thei a, chuvang chuan UC hi pek a ni," an ti.

Central chuan kum 2014-15 chhunga GPG first instalment atan March 31, 2015 khan cheng nuai 466 a rawn pe leh a, kum 2014-15 chhungah hman hman a nih loh avangin K-Deposit-ah bawk dah a ni. AMC hotute chuan, "Kum hlui ni tawp berah an rawn pe a, Mizoram sorkar tan chêt hman ngaihna a awm lo," an ti.

AMC hotute sawi danin, AMC sum hmuhna pakhat zawk, General Basic Grant hnuaiah kum 2014-15 chhung khan Central-in nuai 851.93 a rawn pe a, a pek ni chu March 5, 2015 a ni. Hei pawh hi Mizoram sorkarin AMC-ah a la pe lo a, K-Deposit-ah dah a ni. AMC sum tur Mizoram sorkarin a la hrên mek chu nuai 1,808.37 a nih thu an sawi.

Hetih lai hian, AMC hian state danga GPG dawng vete nena an insem pakhat, kum 2014-15 chhunga mi chu March 24, 2015 khan Central aṭangin nuai 583.54 a dawng. He sum hi a hmanna tur bik action plan uluk taka siam a nih hnuah Chief Secretary hoin High Level Monitoring Committee-in an pawmpui tawh avangin rei lo têah an dawng dawn niin AMC hotute chuan an sawi.

GPG sum nuai 583.54 hmang­a hna thawh tur lian tham chi riat ruahman a ni a; a langsar zualte chu - kea kalna tur over brigde siam, Ch.Saprawnga Truck Terminal tihhmasawn, Ch.Chhunga Bus Terminal-a tui luanna leh bawlhhlawh paihna tur siam, city bus stand siam, AMC pisaa CCTV dahte a ni.

Finance department-in K-Deposit-a a dah mek, hmang tawh anga Central-a report cheng nuai 490.44 pawh a hmanna tur ruahman tawh a ni a; chu'ng zingah chuan - Chanmari aṭanga High School Field panna siam ṭhat, local council in nei lote ṭanpuina, Aizawla tui thianghlim in tur siamnate a tel.