International Day of Yoga hman a ni
Mizoram hmun hrang hrangah nimin khan International Day of Yoga hman a ni a; Governor Lt.Gen. Nirbhay Sharma pawhin Yoga Day pualin thuchah a tichhuak.
Larsap chuan, "He ni pawimawh tak hian kan ram tan Yoga hian taksa leh rilru hriselna kawnga a hmalakna hmangin remna leh muanna ṭha zawk leh hnam inunauna duhawm zawk thlen kawngah a thawh hlawk hle tih a lantir a ni," a ti.
Yoga chu kum 5,000 lai kalpui a ni tawha sawiin, Governor chuan, "Khawvel hmun dangah pawh a lâr tawh hle. Yoga hmang hian hamṭhatna tam tak - taksa hriselna, rilru hrisel leh thlamuanna bakah taksa khawl pumpui hnathawh a siamṭhain rilru hahdamna a thlen thei a ni," a ti a; mi tam takin Yoga vangin taksa hriselna leh rilru zângkhaina an dawng niin a sawi.
Nimin zinga Yoga Day hmanna huaihawttu hi Health department hnuaia AYUSH-te an ni a; hriat theih chinah Aizawl, Lunglei leh Serchhipahte zing karah hman niin, a tak (practical)-a hman a ni.
Hetih lai hian, Mizoram Pradesh Congress Committee chuan thuchuah siamin, Pathiannia International Day of Yoga hman tura tih chu Mizoramah hmang ve lo turin Mizoram sorkar an ngen a; sakhaw ni pawimawh tibuai thei zawnga programme duan chu ṭha lo an tih thu an sawi.
Mizoram Kohhran Hruaitute Committee pawhin June 17, 2015 khan thuchhuah siamin, Yoga Day hmanaah Mizorama Kristian zawng zawngte tel lo turin an ngen.