Intodelh inzirtirnaah MICE pakhatna

Samagra Shiksha Mizoram leh Tharthilthlentu (TiLi) chuan nimin khan Dawrpui Multipurpose Hall-ah 'Intodelh Inzirtirna - Inter School Final 2024-2025' an buatsaih a, Mizoram Institute of Comprehensive Education (MICE) School pakhatna an ni.

Intodelh inzirtirna tura Samagra Shiksha leh TiLi thawh dunna hi July 1, 2024 khan ṭan a ni a; bul ṭanna atan Aizawla sikul 10 - MICE, KM High School, KVM H/S, Hrangchhunga H/S, Central H/S, JL H/S, Mizo Higher Secondary School, Zemabawk HSS, Republic HSS leh Chaltlang HSS-ahte kalpui a ni.

Sikul 10-te chu Rs 2,000 ṭheuh pek niin, Rs 2,000 chu zirlaite'n an thiam danin an peipung a; sum an peipun hmanga hlâwkna an hmuh dan leh an zir chhuahte sawifiahin an intihsiak a ni.

Intihsiakah hian MICE chu pakhatna niin Rs 25,000 an dawng a, pahnihna Chaltlang HSS-in Rs 15,000 leh pathumna Mizo HSS-in Rs 10,000 an dawng. Presenter ṭha ber Mary Lallawmawmi, Chaltlang HSS hnenah Rs 5,000 hlan a ni bawk.

Aizawl district education officer C Lalbiakzauva chuan, Samagra Shiksha leh TiLi thawh dunna kaltlanga intodelh inzirtirna neih a ni chu hmasawnna a nih thu leh project chuan rah ṭha a chhuah ngei a beisei thu a sawi.