Lunglei NGO-te'n state university dinna tur Lungleiah a awm tih Minister-ah an thlen

Lunglei NGO Coordination Committee chuan Lungleiah state university dinna tur ram a awm tih tun hnai khan Higher & Technical Education (HTE) minister Dr Vanlalthlana hnenah ziakin an thlen.

Lunglei NGO-te chuan National Education Policy (NEP)-in state tinte anmahni puala state university kum 2035 ral hmaa din tura a tih bawhzuiin, sorkarin ram a zawng mek nia an hriat avangin HTE Minister hnenah hian Lungleiah sorkar hnena ram pek sa, state university dinna tur ram a awm tih an thlen a ni.

LUNGLEI NGO-TE THU THLEN

• Aizawl khawpuiah Mizoram University changtlung tak a awm tawh a, Pachhunga University College (constituent college) bakah, ICFAI University leh college changtlung tak tak Aizawl khawpuiah a awm.

• Lungleiah hian Mizoram University Southern Campus hmun tur fel sa a awm. Hei hi NGO Coordination Committee chuan state university campus hmun atan hman rem kan ti.

• State university atan kan hmun neih sa buatsaih chhung atan, Engineering College building, eng atan maha hman ni lo, tuna a ruaka awm mek hi hman nise

• Lunglei hi Mizoram, ram lailia awm leh khawpui hlun leh upa a ni a, state university awmna atan a remchangin, a ṭha tawkin kan hria.