KHAWTHLIR

Legal awareness

Mizoram State Commission for Women (MSCW) bultumin nimin khan Sialsuka Lalṭanpuia Hall-ah 'Legal Awareness Programme on Laws Related to Women & Health and Nutrition' buatsaih a ni. MSCW chairperson C Laldinpuii'n dan hnuaia hmeichhiate hamṭhatna a sawi a, member secretary Zonunpari Sailo-in hmeichhe tana hriselna leh ei leh in ṭha pawimawhna a sawi. Legal Cell member Lalnunsiama'n dan thar hnuaia hmeichhiate hamṭhatna leh humhimna leh, The Mizo Marriage, Divorce and Inheritance of Property Act, 2014 a sawifiah bawk.

Traffic bungrua pe

State Bank of India (SBI) Regional Office, Aizawl January 16, 2025 khan Aizawla traffic police-te hman tur bungrua chi hrang hrang Rs 10,97,190 hû Traffic SP Stephen Lalrinawma hnenah an hlan. Bungruate chu - road signage (with pole) 44, colour consistency jacket 300, safety reflector jacket 300, traffic convex mirror 50 leh computer pakhat a ni.

Road safety campaign

Siahaa Nehru Yuva Kendra chuan nimin khan MADC Forest conference hall-ah 'Road Safety Volunteers Orientation Training & Road Safety Awareness Campaign' an buatsaih a, MADC Sports & Youth officer S Vabeihasa-in a hmanpui. Training-ah hian Siaha district-a khaw hrang hrang aṭangin mi 27 an tel a, traffic dante zirtir an ni. MADC pisa aṭanga Vaihpi Traffic point thleng kawng an zawh bawk.

Order copy hâl dawn

Free Movement Regime tihtawpna leh India-Myanmar ramri kân tura border pass siam tura tihna sorkar laipui order leh Mizoram sorkar order chu ZORO chuan January 29, 2025 khian an hâl dawn. Order copy hâlna hun hi Aizawl bakah, Mizoram hmun hrang hranga buatsaih tum a ni a; an hmalakna thlâwp turin Mizoram mipui an ngen. ZORO chuan, Zo hnahthlakte'n an dikna chanvo an neih let leh theih nan a tàwp thlenga an beih dawn thu an tarlang.