VC/LC thlan atan inbuatsaih mek

Champhai, Kolasib, Serchhip leh Hnahthialah nimin khan district election officer (DEO)-te kaihhruaiin sorkar hotu te, political party leh tlawmngai pawl hruaitute'n village council inthlanpui neih tura inbuatsaihnate an sawiho a; Lungleiah returining officer-te tan training buatsaih a ni bawk.

District palia ṭhutkhawmah hian VC inthlanpui tluang taka neih a nih theih nan thawhhona ṭha neih a pawimawh thu te, Model Code of Conduct ṭha taka zawm a nih theih nan theihtawp chhuah a ṭul thute sawi a ni. Political party-te chu boruak tichhe zawnga hma la lo tur leh tlawmngai pawl hruaitute pawh inthlanna muanawm leh felfai a awm theih nana thawhpuiah DEO-te chuan an sáwm.

Lunglei DC conference hall-ah Lunglei district-a VC leh local council inthlan atana returning officer (RO)-te tan training buatsaih a ni a; chawhma lamah Lunglei Municipal Council (LMC) huam chhunga LC 24 inthlan neih tura returning officer-te tan training buatsaih niin, chawhnu lamah Lunglei district-a VC 88 atana returning officer turte tan buatsaih a ni.

Training-ah hian MCC-in hna ṭan tawh leh hna zawh tawh hlawh inpek a dâl loh thu te, sorkar hnathawkte chu candidate campaign pui lo tur leh ṭan lam neia ṭawngkam nei lo tura hriattir an nih thute an tarlang. Ruih theih thil leh thil dang tibuai thei lakah inthlan buaipuitu turte leh mipuite fihlim turin an inchah bawk.