HIV/AIDS donaa ṭanho dan tur sawiho

Mizoram State AIDS Control Society (MSACS) hotute leh National AIDS Control Program (NACP) hnuaia a thawhpui pawl (NGO) hrang hrang hruaitute nimin khan Whitestone Conference Hall, Aizawlah an inkâwm a, HIV/AIDS donaa ṭan lakho zel dan tur an sawiho.

Inkawmhona hi MSACS project director Dr Jane R Ralte-in a kaihruai a; NGO-te'n hna an thawh ṭhat avangin HIV/AIDS-ah Mizoram dinhmun la ṭha lo hle mah se, zawi zawia hma an sawn zel thu a sawi.

MSACS Project Director hian MSACS-in a thawhpui NGO zinga sum leh pai enkawlna leh hman dana ti ṭha zual pathum hnenah lawmpuina certificate a hlan a; chungte chu - JERACOM (IDU project) Darlawn, Samaritan Society of Mizoram (Migrants project), Mamit leh, Zoram Drivers Ramthim Board (IDU project) Seling te an ni.

Inkawmhonaah hian MSACS hotute bakah, targeted intervention 36-a project director-te leh link worker scheme pariata project director-te an tel a ni.