Kawngpui siamtute'n Governor an kâwm

Governor Gen. Vijay Kumar Singh chu nimin khan Raj Bhavan-ah Project Pushpak chief engineer Girish Prasad Singh leh National Highways & Infrastructure Development Corporation Limited (NHIDCL) Regional Office, Aizawl executive director Virendra Kumar Jakhar ten an kâwm.

BRO CE Gorosh Prasad Singh nen an inkawmnaah Governor chuan, Mizoram, tlang ram chhengchhe takah technology thar ber berte chhawr ṭangkai chunga hun leh senso tlem zawka inkalpawhna ṭha zawk siam tum tur leh an project-te a hun taka zawh a nih theih nana harsatna awmte a rang lama chinfel dan ngaihtuah zel turinin a chah.

Girish Prasad Singh chuan, BRO-in Mizoramah kawngpui km. 3,150-a thui an siam zawh tawh thu leh km. 2,392 chu state leh central agency-te kutah an hlan tawh thu a sawi. Mizorama kawngpui 14 an enkawl mek zinga panga chu an siam zawh hnuah an enkawl zui mek thu leh kawngpui palia lei (bridge) dawh mek tih loh chu an zawh tawh thu te, kawng siam mek panga a awm thu te, kumin chhungin lei pali hi dawh hman an tum thute a sawi bawk.

NHIDCL executive director Virendra Kumar Jakhar nen an inkawmnaah Governor chuan, hun tiam chhungin kawngpui ṭha leh tlo siam zo hman tura ṭan la tur leh, Silchar pawhtu kawngpui ngai pawimawh zual turin a chah.

NHIDCL Executive Director-in a tarlan danin, Mizoramah national highway (NH) km, 1,523-a thui awm a, chu'ng zinga km. 921 chu NHIDCL enkawl niin, km. 602 chu Mizoram PWD kutah a awm. NHIDCL enkawl zingah km. 547-a thui siam zawh a ni tawh a, km. 221 an siam mek a, hmabak km. 153 an la nei a ni.