January-December 2024 chhungin Aizawl dist-ah thubuai 1,460 ziak lut

Nimin khan Aizawl SP pisa conference hall-ah Aizawl District Crime Review Meeting neih a ni a; kum 2024 chhungin Aizawl district-a police station hrang hrangah thubuai 1,460 ziah luh a ni a, kuminah January 15 thlengin thubuai 104 ziah luh a nih tawh thu tarlan a ni.

Ṭhutkhawma tarlan danin, January-December 2024 chhung khan Aizawl district-a thubuai ziah luh 1,460 zinga 489 chu Aizawl Police Station-a ziah luh a ni a, thubuai ngah ber PS a ni. Thubuai 1,460 zinga 712 (48.77%) chu chhui zawh tawh leh chargesheet siam tawh a ni a; chhui mek 404 a la awm.

Kumin 2025-ah January 1-15 chhung khan thubuai 104 ziah luh a ni a, chu'ng zinga 57 chu chhui chhuah (detect) tawh a ni.

Aizawl SP Rex Zarzoliana Vanchhawng chuan, mahni hna leh mawhphurhna ṭha taka hlen zel tur leh, taima tak leh inpekna tak tak nena thawk turin Aizawl district police-te a chah a, "Dan leh thupek kenkawh kawngah dan ang zela kal a pawimawh a, mipui himna ngaih pawimawh a ṭul a, hnuchhui (investigation)-ah tun aia inchher hriam a ṭul," a ti a; thil sual titute'n dan hnuaiah an phu tâwk hremna an hmuh ngei theih nan ṭan la thar turin police-te a fuih.

Crime Review Meeting-ah hian kum 2024 chhunga Aizawl district-a pawikhawina thleng te, PS hrang hranga thubuai ziah luh leh dan leh thupek kenkawhnaa police hmalaknate thlir lêt a ni a; kum 2025-a dan leh thupek kenkawh leh misual chhuinaa hmalak dan turte sawiho a ni bawk.

Ṭhutkhawmah hian sub-divisional police officer (SDPO) te, deputy SP (Prosecution) leh Aizawla police station hrang hranga officer-in-charge-te an tel a ni.