Thisen pe turin Mizo ṭhalaite ngen

Association for Volun-tary Blood Donation (AVBD) chuan thuchhuah siamin, tunlai hian thisen pe an tlem avangin thisen pe turin mimal leh pawlte an ngen.

AVBD chuan, kum tàwp lam Krismas vuakvêt velah pawl hrang hrangin tih tur an ngah ṭhin avang leh kum thar tìr chu pawl hruaitu insîksawi lai a nih avangin pawl hming leh mimala thisen pe an tlem ṭhin lai a nih thu an sawi a, "Kum thar 2025 January thlaah pawh blood bank hrang hrangte'n blood donation camp neihna tur an nei mang lo. Hei vang hian blood bank-ah thisen dah khawl sa lak mai tur a awm mang lo a, thisen mamawhte'n thisen petu tur an zawn a ngai tlangpui," an ti.

Tunlaiin thisen pek a tlakhniam avangin AVBD chuan kohhran ṭhalai pawlte leh NGO dangte thisen pek dan kawng zawng tura an ngen bakah, mimal ang pawha thisen pek uar zel turin ṭhalaite an ngen. Thisen pek a tlakhniam avangin zirna-in ṭhenkhatte biain, thisen pe turin a ngen tih sawiin AVBD chuan, an ngenna ngai pawimawha thisen pe tura inruahman mekte chungah an lawm thu an tarlang.

AVBD tarlan danin, MSACS leh blood bank-te nena December 2024 chhunga Krismas puala thisen pek an kalpuiah Aizawl district-a blood bank pathumah Krismas pualin thisen unit 1,278 pek a ni a, thisen petute mipa 1,032 leh hmeichhia 246 an ni. Civil Hospital, Aizawl tan mi 944, Synod Hospital tan mi 118 leh ZMC tan mi 216-in an pe a ni.

AVBD chuan, Krismas puala thisen pe tura an ngenna leh sawmna ngai pawimawha Krismas puala thisen an petute inpekna leh tlawmngaihna ropui an tih thu an tarlang a, "Mi tana an inpekna hi mi dang tan malsawmna a ni a, damlo tam takin damna an chan phah a ni," an ti.