KHAWTHLIR

KṬP-in thisen pe

January 18, Inrinni khan KṬP, Mission Vengthlang Branch chuan an kohhran hall-ah ZMC tan thisen unit 82 an pe a, petute mipa 67 leh hmeichhia 15 an ni. KṬP, Zemabawk North Bial pawhin Synod Hospital tan unit 39 an pe bawk.

Lirthei tlan khap

Mamit SP Pukhraj Kamal chuan hriattirna chhuahin, West Phaileng leh Marpara inkar kawng siam mek chu chak zawka siam a nih theih nan January 17, 2025 aṭanga February 16, 2025 thleng zing dar 8 aṭanga chhun dar 12 inkar leh chawhnu dar 1 aṭanga tlai dar 4:30 inkarah lirthei tlan phal a nih loh thu a tarlang.

Mi bo zawng

PHE department-a muster roll-a thawk mek Zosangliana (37) s/o Rualthankhuma, Chanmari, Aizawl, chu January 17, 2025 zan dar 8 vela sangha man tura a chhuak chu hmuh zui a ni lo a, Maubawk leh Chanmari branch YMA-te'n an zawng a, nimin tlai thleng khan hmuh a la ni lo. Zosangliana hian Tlawng lui Reiek kai velah lènkhang a zár nia hriat a ni a, tuiah a tla nia rin a ni.

MPYCC hruaitute tel

Indian Youth Congress chuan Agartala, Tripura-ah ni thum awh North East Youth Convention an buatsaih a, a tàwp ni, January 18, Inrinni khan Mizoram Pradesh Youth Congress Committee president Laltawnliana'n thu a sawi. MPYCC President chuan, "Hmarchhak state hrang hrangte hi BJP sorkar leh an thawhpuite'n kan harsatna remchanga hmangin min ṭhen darh mek a ni," a ti. Convention-ah hian MPYCC hruaitu dangte pawh an tel a ni.

Din champha lawm

Zoram Thar Zofate Lairelna Inpui chuan January 18, Inrinni khan Chaltlang Tourist Lodge-ah Zoram Thar kum 10 tlin an lawm. Inkhawm hi Zoram Thar ziaktu lian Lalruatfeli Hlawndo-in a kaihruai a, Zoram Thar hruaitu Rev. Dr Zaichhawna Hlawndo-in kum 10 chhunga an hmalaknate leh an hmathlirte a sawi. Kum 2018 leh 2023 MLA inthlanpuia an pawl aiawha MLA candidate mi 30 hnenah chawi­mawina an hlan bawk.