Mizoramah property card 2,909 sem tawh; Property card 35,000 vel pek tum a ni

Survey of Villages and Mapping with Improvised Technology in Village Areas (SVAMITVA) scheme kaltlangin Mizoramah property card 35,000 vel pek chhuah tum a ni a, card 2,909 sem tawh a ni tawh.

SVAMITVA scheme hnuaiah hian prime minister Narendra Modi chuan January 18, Inrinni khan India rama state 10 leh union territory pahniha in hmun neitu mi nuai 65 chuangte hnenah property card a sem a ni.

Prime Minister-in property card a semna hi online kaltlangin Governor Gen. VK Singh hoin Raj Bhavan-ah Land Revenue & Settlement minister B Lalchhanzova leh department hotu dangte'n an chhim a; PM-in property a card sem zingah hian Mizorama khua 18-a property card 1,754 a tel.

Governor VK Singh chuan, Mizoram chu hmarchhak state-a property card sem hmasa ber a ni chu chhuanawm a tih thu sawiin, LRS department hotute chu SVAMITVA scheme hnuaia hmalaknate a hlawhtlin theih nana ṭan la chhunzawm zel turin a chah a; Mizoram aṭanga hamṭhatna dawngtute a lawmpui thu a sawi.

SVAMITVA SCHEME-A MIZORAM DINHMUN

• April 24, 2020 khan Prime Minister-in a hawng a, inhmun neitute tana revenue document felfai tak, drone survey leh GIS technology hmanga chhinchhiah thlapna a ni a; bank loan lak nana dahkham bakah, pawimawh dangahte pawh hman theih a ni.

• Scheme kalpui tur hian Mizoram sorkar leh Survey of India chuan July 8, 2021 khan thawhhona thuthlung an ziak.

• Revenue survey la tih lohna khuaahte December 9, 2021 aṭang khan drone survey tih ṭan a ni a, December 2, 2024-ah zawh a ni.

• Drone survey hi Mizorama district pakuaa khua 319-ah neih a ni.

• Property card hi Mizoramah April 24, 2023 khan sem ṭan a ni a, India hmarchhak state zinga sem hmasa ber a ni.

• January 18, 2025-a sem chhuah nen hian tun dinhmunah Mizoramah property card 2,909 sem a ni tawh.

• Ruahman dan chuan Mizoramah property card 35,000 vel pek chhuah tum a ni.