Girl Child Day pualin kawng zawh

January 18, Inrinni khan Champhai leh Kolasib-ah National Girl Child Day (January 24) leh Beti Bachao Beti Padhao kum 10 tlin pualin hun hman a ni a; kumin Girl Child Day thupui chu ‘Empowering girls for a bright future’ tih a ni.

Champhaiah chuan Women & Chiled Development hnuaia Hub for Empowerment of Women hmalaknain Tlangsamah hun hman a ni a; district mission co-ordinator K Lalrinfimi kaihhruaiin Tlangsam Presbyterian English School zirlai te, Tlangsam Branch KṬP member-te leh DPO hotute'n kawng an zawh a; hmeichhe naupangte venhimna lam hawi thuziak an keng.

Kolasib-ah pawh District Hub for Empowerment of Women huaihawtin zing dar 7-ah DC Bangla aṭanga DC Office kawt thleng kawng zawh a ni a, Kolasib-a zirlaite leh WCD-a thawktute'n an tel. Hmeichhe dinhmun humhalh a pawimawh thu leh mipate chu hmeichhe inhumhimna tur an nih thute hmangin an au rual a; Beti Bachao Beti Padhao thuthiam an chham rual bawk.

National Girl Child Day hi hmeichhe zirna chungchanga hriatna thehdarh leh hmeichhe naupangte'n an theihna kawng an hriat theihna hun remchang siamsakna atan hman ṭhin a ni a; hmeichhiate dikna chanvo humhalh leh zirtirna atan te, hriselna leh ei leh in ṭha an dawn theihna atan te, mipa leh hmeichhe inkara tharum thawhna dona atan leh naupang inneihna laka humhalhna pholanna atan hman ṭhin a ni bawk.

Beti Bachao Beti Padhao hi sorkar laipui scheme a ni a, 'Hmeichhe naupang venghim la, zirtirna ṭha pe rawh' tihna a ni. Kum 2015 khan hman a ni a, mipa leh hmeichhia inthliarna dona kawnga hmalakna atan te, hmeichhiate tihchaka tihhmasawn nan leh hmeichhe fa pum chhunga an awm lai leh an pian hlima tihhlum ṭhin dona tura duan a ni.