CESJ-in Siaha damdawi-ina thihna an dem

Centre for Environment & Social Justice (CESJ) chuan, January 10, 2025-a Siaha District Hospital-a inthlahdahna (medical negligence) vang nia ngaih theiha Daniel Lalruatfela (24) thihna chu pawi an tih thu an tarlang a, thil thlen dan chhuitu turte chu uluk taka chhui turin an ngen.

CESJ chuan thuchhuah siamin, mi rethei tak takte'n an awmna aṭanga hnai bera damdawi thiamte chu an beiseina an nih thu sawiin, "An ṭawngkam ringawt pawh min thlamuantu leh damna min petu a nih laia hetiang thil a thleng leh ṭhin hi a pawi kan ti tak zet. Hetiang hi Mizoramah vawi tam tak a thleng tawh," an ti a; Siaha damdawi-ina thil thleng chu doctor on-call duty awm se chuan, Danial Lalruatfela nunna chhan theih ni lo mah se, a chhungte leh mipui lung a dam tur thu an tarlang.

Siaha District Hospital-a Daniel Lalruatfela thih dan chhuitu tur Health & Family Welfare Principal Director-in January 16, 2025-a a ruat chu lawmawm an tih thu sawiin CESJ chuan, "Mipui ngaihdana damdawi thiamte inthlahdah vanga thihna hial a thlen pawha inṭan ṭhinna awm hi a tawp theih nan he thil chhui tura ruatte'n uluk taka hlen turin kan ngen a ni," an ti.

CESJ chuan, Mizoram chu kum 38 state a nih hnuah hriselna lama inelnkawlna a la chhe hle nia sawiin, "Healthcare inziah luhna a to em em a, mirethei tan damdawia inenkawlna kawngah dam khawchhuahna a chaurau hle," an ti a; mipuiin sorkarah chhiah tam tak an chhûn luh laiin, damdawia enkawlna an dawn let erawh a beitham hle niin an sawi.

CESJ hian Mizoram sorkar chu Indian Public Health Standards (IPHS)-in damdawi-in nihphung tur a tarlan ang taka Mizoram sorkar hnuaia damdawi-inte kalpui turin an phût a; "IPHS norms kalpui a nih loh vang hian damdawi thiam inthlahdahte'n chhuanlamah an hmang ṭhin. Mizoram sorkar hian a hun hmaa thihna leh a hnam pum anga hrisel lohna hrang hrangte a ziaawm theih nan damdawi thiam post create hi ngai pawimawh berah nei rawh se," an ti.