MLA-in khelmuala phûllem phah a tlawh

Hachhek bialtu MLA Robert Romawia Royte, MNF ṭhalai president chuan January 18, Inrinni khan Mamit Luangpawl tlanga Mamit Residential School behchhana football khelmuala phûllem phah zawh tawh a tlawh.

Robert Romawia Royte chuan, Mamit district chu ngaihtuah bik ngai district atana sorkar laipuiin a thlan, Aspirational district Mizorama awm chhun a nih thu sawiin, "Mamit district-a MNF sorkarin zirna leh infiamna ruhrel ṭha tak tak a lo din hi sorkar laipui leh Mamit district mipui duh dan tihhlawhtlinna a ni," a ti.

Kum 2018-a MNF a sorkar hmain Mamit district-ah infiamna hmunhma ṭha a awm lo nia sawiin Robert Romawia chuan, "Tunah erawh chuan hmun tinah Mamit district hmun pangaah phûllem phah field siam zawh tawh a ni," a ti a; zana inkhelh theihna turin volleyball court leh basketball courts-te pawh Mamit district-a khaw hrang hrangin an nei tawh thu a sawi.

MNYF President chuan, Mamit district chu Mizorama district hmasawn chak leh hmasawnna thlen theihna hmun a nih thu sawiin, "Central sorkar duh danin state sorkar pawhin a ngaihsak ve tur a ni ang," a ti.