2022-ah Mizoramah solar power Megawatt 122 siam hman tum
Sorkar laipui chuan kum 2022-ah Mizoramah solar power megawatt 122 siam chhuah hman a tum a; Mizorama BPL chhungkuate hnena sem turin solar lighting system ruahmanna kalpui mek a ni.
Centre for Science and Envi-ron-ment (CSE) chuan August 11-12, 2016 khan NEDFI con-ference hall, Guwahati-ah '100% Renewable Energy Future for North East' tih thupui zirhona an buatsaih a; resource person, Ministry of New and Renewable Resources (MNRE)-a advisor (NE) Dr Dharmaranjan Das chuan, Solar Energy Corporation of India (SECI) hmanga sorkar laipuiin solar energy lama tan a lak dan a sawifiah.
Dr Dharmaranjan Das chuan, kum 2022-ah Mizorama solar power megawatt 122 pe chhuak thei bun hman tum a nih thu a sawi a, "Leiah megawatt 72 pe chhuak thei leh in chungah megawatt 50 pe chhuak thei bun tum a ni," a ti.
MNRE Advisor sawi danin, kum 2022 chhung hian India hmarchhakah solar power megawatt 1,841 pe chhuak thei bun hman tum a ni a, chu'ng zinga megawatt 122 chu Mizorama bun tum a ni. Hmarchhak state pali-ah solar park din tuma hmalak mek a ni a, solar park siamna turah hian Mizoram telh a ni lo.
Dr Dharmaranjan Das chuan, in chunga solar power siam duh, mimal, sikul leh khawtlang tan 30% subsidy pek theih a nih thu sawiin, "Sumdawng leh sorkar inah erawh chuan subsidy pek theih a ni lo a, sorkar tan bik an tihṭhat dan azirin lawmman a awm thei," a ti.
Hmarchhakah kawlphetha indaih lohna a nasat thu sawi-in MNRE Advisor chuan, "Hmar-chhak hian kawlphetha megawatt 14,488 a mawh laiin, megawatt 13,735 chiah a siam chhuak a, indaih lohna hi megawatt 753 a ni," a ti a; kawlphetha indaih lohna chu solar power hmanga chinfel theih a nih thu a sawi.
Dr Dharmaranjan Das sawi danin, state-in solar power siam chhuah a duh chuan SECI hnuaiah scheme hrang hrang a awm a, chung zingah chuan a senso a zatve (50:50) intum semin solar power siam theihnate pawh a awm.
Vanglaini palai zawhna chhanga SECI hotute'n an sawi danin, SECI hian Mizoramah solar lantern 1,000 an sem tawh a, tunah hian BPL chhungkaw tan a thlawnin solar home lighting 1,000 sem tura ruahmanna kalpui mek a ni.
SECI hotute chuan, in chunga solar energy project atan megawatt 500 siam chhuah theih-na tur tender an chhuah tih sawiin, 'Hei hi hmarchhak state pual bika tih a ni," an ti.
Workshop-ah hian hmarchhak state hrang hranga chanchinbu mite an tel a, CSE deputy director Aruna Kumarankandath kaihhruaina hnuaiah zawhna leh chhanna leh sawihona hun hman ṭhin a ni.
2022-a NE-a solar power siam tum dan
State In chungah Leiah Total
Arunachal Pradesh 50 MW 39 MW 89 MW
Assam 250 MW 663 MW 913 MW
Manipur 50 MW 105 MW 155 MW
Meghalaya 50 MW 161 MW 211 MW
Mizoram 50 MW 72 MW 122 MW
Nagaland 50 MW 61 MW 111 MW
Sikkim 50 MW 36 MW 86 MW
Tripura 50 MW 105 MW 155 MW
Total 600 MW 1,241 MW 1,841 MW