Synod puipate HIV sawipui

Health minister Lal Thanzara chuan, nimin khan Chief Minister's Office conference hall-ah Mizoram Synod puipate kâwmin, HIV/AIDS dona kawnga thawhho dan tur a sawipui.

Lal Thanzara chuan, HIV/AIDS donaah sorkar leh kohhrante ṭan rual a ngaih thu sawiin, "Tuna kan ram dinhmun hi a duhawm lo hle a, India ramah HIV hluar berna state Nagaland dawttu kan nih avangin hmalakna kal mek hi awmze nei zawka tihchangtlun a ngai a ni," a ti a; sorkar leh MSACS hmalakna kal mek chu thláwp tur leh kohhran mite himna atana ṭan lakpui turin a sáwm.

Health Minister chuan, HIV/AIDS-in Mizoram a rûn mek tih sawiin, "Mizo awm chhung chuan kohhran hi a awm dawn a, kohhrante hi mipui zirtir tura platform nei ṭha ber an nih avangin kohhrante kan ṭan lehzual a ngai a ni," a ti.

Synod puipate hi mo-de-rator Rev. H Lal-rinmawia hoin paruk an kal a; Synod puipate chuan, kum 1990 vel aṭangin Mizoram Presbyterian Kohhranin HIV/AIDS chungchangah hma an lak ṭan tawh thu te, kohhran chu platform nei ṭha an nih angin tun thlengin an theih ang angin hma an lak reng thu te, sorkar nen pawh an ṭanho reng thu te, hmalak zelna turah sorkar nen mumal taka ruahmanna siam ṭha an tih thute an sawi a ni.

Rev. H Lalrinmawia chuan, "Biak-in leh rem-chang apiangah HIV leh ruihhlo leh mipat hmeichhiatna hmansual chungchang hi sawi a ni tawh ṭhin, a ti a; MSACS lehkhabu pawh kan hman ṭangkai ṭhin thu leh Synod rorel leh hunah pawh MSACS lehkhabu chu sem darh an remtih thu a sawi.

Inkawmhonaa MSACS project director Dr Lalmalsawmi Sailo-in Mizorama HIV/AIDS dinhmun a sawi danin, October 1990 aṭanga March 2016 thleng khan Mizorama thisen endik tawh 3,52,737 zinga mi 11,374-in HIV hrik an pâi tih hmuh chhuah a ni a; HIV hrik pâi zinga mi 7,164 chu mipa niin, 4,210 chu hmeichhia an ni.

HIV hrik pai hmuh chhuah tawh zingah mipat hmeichhiatna aṭanga kai tam berin, 7,908 (69.53%) an ni a, mipa 4,438 leh hmeichhia 3,470 an ni. Inchiuna aṭanga kai mipa 2,375 leh hmeichhia 420, an vaiin mi 2,795 (24.57%) an awm a; nu aṭanga kai mipa 197 leh hmeichhia 208, an vaiin mi 405 (3.56% an awm. Kai chhan hriat loh mipa 154 leh hmeichhia 112, an vaiin mi 266 (2.34%) an awm bawk.