Awmze neia sorkar zu zawrh chhan leh NLUP & NEDP kalpui dan Hawla'n a sawi

MPCC president Lal Thanhawla chuan, sorkarin zu a zawrh chhan a sawifiah a; sum a enkawl thiam vangin NLUP leh NEDP an kalpui thei niin a sawi bawk.

Nimin khan Congress party-in Congress Bhavan-a political session a buatsaihah thu sawiin Lal Thanhawla chuan, "MLPC Act hman a lo nihin kohhranin ṭawngṭai rualna nen hun hmang mah se, ṭawngṭaina chhanna chu awmze nei deuha zu zawrh hi niin a lang," a ti.

MPCC president chuan, "Finance Minister kaihruaina hnuaiah sum harsatna zualpui a bo a, sum hman kawngah thiam em em lo mah ila, kan Finance Minister hnuaiah sorkarin kan duh ang tih theih loh kan la nei lo. Financial management thiam lo ni ila vawiin thlenga NLUP sem tur hi kan nei lo ang; NEDP pawh siam mah ila, kan sorkar chhung chuan NLUP kan kalpui zel dawn a ni," a ti.

Lal Thanhawla chuan, health worker 200 lak a nih dawn thu te, kum 2018-ah chuan medical college neih a beisei thu te, Independence Day-ah Lammual bikah free-wifi dah tum a nih thute leh, Millennium Centre-ah free wifi awm reng tura ruahman a nih thute a sawi bawk.

Home minister R Lalzirliana pawhin thu sawiin, "MLPC Act hi principle nei taka siam a ni a, chhiah ît vang emaw, MLTP Act thlakna tur ngawr ngawr emawa siam a ni lo. Kum khat chauh zawrh a nih chhungin a chhiat leh a ṭhat hriat chian tak tak theih a la ni lo a, a zir chiangtu Review and Evaluation committee te pawh an thutkhawm tawh," a ti.

R Lalzirliana chuan, "MNF party-in zu chungchangah kalpui dan tur mumal tun thlengin an la nei lo. Central YMA leh sorkarte'n ruihhlo do kawnga thawhhona an neihte hi MNF party rilru tinatu a ni," a ti a; HPC(D) leh Mizoram sorkar inbiak chhan chu Hmar mipuite'n remna leh muanna an mamawh a, inbe tura sorkar an ngen vang a nih thu a sawi.

Congress party political session hi MPCC general secretary R Liantluanga'n a kaihruai a; Mizoram Youth Commission chairman T Sangkunga, MLA pawhin thu an sawi a; Congress party zawm thar mi eng emaw zat an lawm lut.