Law Enforcement Technology Exhibition

CID (Crime) hnuaia State Crime Record Bureau (SCRB) chuan, nimin khan Aizawl SP pisa conference hall-ah Law En-forcement Technology Exhi-bition buatsaihin, information technology kaihhnawiha an khawl thar neihte an pho chhuak a, DGP Thianghlima Pachuau-in a hawng.

Exhibition hawnna inkhawm hi CID (Crime) SP Lallianmawia'n a kaihruai a; DGP Thianghlima Pachuau chuan, tunlaiah social media a chak a, mi tam takin a ṭha lo zawng leh mi pawi sawi zawngin social media an hmang nasa tih a sawi

DGP chuan, "Police pawh, civil mi pawh, mi fing nih kan tum lutuk a, thil hre hmasatu leh post hmasatu nih tum vangin thil kan ti mai zel a. Hman ní lawkah pawh nasa taka kan hnathawh, kan hlawhtlinna chu thlalak pakhat vangin kan zero phah a ni," a ti.

Thianghlima Pachuau chuan, thil hre hmasatu nih te, social media-a thil po chhuak hmasatu nihte chu thil ṭul lo a nih thu sawiin, "Social media-a thil post lo turin police-te chu kan inhrilh nasa tawh," a ti a; mobile phone leh computer-te chu a ṭha a, a ṭangkai em em rualin, miin an hman sual nasat thu leh, bank account-te pawh miin an hmang sual nasat avangin fimkhur a ngaih thu a sawi.

Sual do turin police-te leh mipui an ṭanho ṭhat a pawimawh thu sawiin, DGP chuan, "Kan ṭan khawm a ngai. Civil lamin min puih loh chuan hna a chak thei lo a, mipuiin min thlâwp a ngai. Keini pawh mipuiin min koh chuan kan hman lo tih a awm tur a ni lo. Kan ṭanho chuan sualna a tlahniam ngei ngei ang," a ti.

Law Enforcement Technology Exhibition-ah hian Mizoram police-a unit hrang hrangte'n infor-mation technology kaihhnawih hmanrua leh khawl an neihte an pho chhuak a; police-in an hman
ṭangkai theih private security firm leh mimal ṭhenkhatin an bungruate an pho chhuak bawk. A hawnna inkhawmah hian Mizoram police-a unit hrang hrang hotute an tel a ni.