KHAWTHLIR

OPD chawlh sût

Mizoram sorkar chuan, sorkar damdawi-in hrang hranga out patient department (OPD) leh department ṭhenkhatte thla khata Inrinni vawi hnihna leh vawi lina chawlh (holiday)-a a puansak tawh chu a sût leh. Hemi chungchanga hriattirna hi chief secretary Lalmalsawma chuan August 11, 2016 khan a tichhuak a ni.

Drone phal lo

August 15, Thawhṭannia Independence Day lawmna pui ber Lammuala neih turah thlalakna thlawk thei (drone camera) hman phal a ni lo a, ti lui an awm chuan dan anga hrem theih an ni. Hei hi venhimna kaihhnawih thil vanga tih a ni.

Freshers’ Social

Lungleia J Buana College chuan an Students’ Union huaihawtin Saikuti Hall-ah Freshers’ Social an hmang a, Lung-lei HPC vice chairman S Laldingliana, MLA-in a hmanpui. JB College-ah hian zirlai 571 an awm mek a ni.

Hindi course zo

District Institute of Education & Training (DIET), Aizawla zirtirtu ni tura zir mek, PSTE 3rd. semester zirlaite puala Central Institute of Hindi (CIH), Agra nen
ṭanghoa Hindi orientation course, July 26, 2016-a an buatsaih ṭan chu nimin khan zawh a ni a, DIET Aizawl Gymnasium-ah a kharna inkhawm hman a ni.

NLUP sem

Serchhipa Sericulture department chuan, nimin khan an pisaah NLUP third phase leh fourth phase hnuaiah ṭanpuina an sem. Ṭanpuina hi 3rd. phase-a chhungkaw 14 hnenah third instalment Rs. 10,915 ṭheuh, 4th. phase-ah first instalment Rs. 10,000 ṭheuh, 4th. phase second instalment Rs. 19,800 ṭheuh pek a ni.

S&G president la lut

Nimin khan Champhai DC conference hall-ah Champhai district Bharat Scouts & Guides president atan Champhai DC Vanlalngaihsaka ruatna, President Investiture Programme hman a ni. He hunah hian Champhai Presbyterian English School hnenah Golden Arrow Award hlan nghal a ni bawk.