Librarian's Day vawi 6-na hman a ni

Mizoram State Library bultumin nimin khan Chanmari YMA Hall-ah Librarian's Day hman a ni a, Art & Culture minister R Romawia'n a hmanpui. He hunah hian library-a lehkhabu chhiar taimate hnenah lawmpuina hlan a ni.

Art & Culture Minister chuan, Mizote zingah lehkha chhiar ngut ngut aiin titinaa fiamthu nena ri huau huaute an langsar fo nia sawiin, "Lehkha chhiar taimate kan ngaisang lo a, lehkha ziaktute pawh kan ngaisang lem lo. Hemi kawngah hian zir tur kan ngah a, khawvel thiamna tuikhur in a, mi dang hnena thiamna petute ngaisan nachang kan hriat a ngai," a ti.

R Romawia chuan, lehkha ziah lama phûr leh ṭhahnemngaite vawrh chhuak turin sorkar leh department-in theihna an la nei rih lo tih sawiin, "Kohhran lamte an ṭang a, thu ziah lam tihmasawntute an ni a. Pathian thu leh Bible commentary lam pawh kan ngah tawh viau a ni," a ti a; sum tam tak senga kohhrante
ṭhahnemngaihna chu lawmawm a tih thu a sawi.

Tunlaia Mizo nula tlangvalte ngainat zâwng te, media hrang hranga an thil vawrh chhuahte enin, Mizo hnamin hma lam hun êng tak a neia a hriat loh thu sawiin, Romawia chuan, "Literature zawnga thlir phei chuan ṭawng an tichhe mek a;
ṭhangtharte'n kawng dik an zawh theih nan ṭan lak a ngai," a ti a; ṭhalaite'n kawng dik an zawh theih nan leh ram leh hnam tana
ṭangkai tur mite'n an chhiar theih tur zawng khawm thiam turin library enkawltute a chah.

Librarian's Day hmannaah hian 'Best Reader's Award' hlan a ni a, a dawngtute hnenah Art & Culture Minister-in a hlan. Art & Culture secretary Thanhliri Pachuau-in thu a sawi bawk.

Mizoram State Library aṭanga naupang zinga award dawngtute chu - pakhatna Lalnuntluanga s/o Joseph Lalremmawia, Tuikhuahtlang; pahnihna Lalnunmawii d/o Joseph Lalremmawia, Tuikhuahtlang; pathumna PC Zoremsdanga s/o PC Lalduhawma, Maubawkte an ni.

Aizawl District Library aṭanga puitling zinga award dawngtute chu - pakhatna Lalnunpuii d/o PK Thawnga, Tlangnuam; pahnihna Ramzauzeli d/o Lalhliapi, Kulikawn leh, pathumna Pentecost Thangrimawia s/o Laibata, Maubawk te an ni.

Librarian's Day hi kum 2009-ah hman
ṭan a ni a, Father of Indian Library Science an tih, Dr SR Ranganathan pian ni, August 12-ah hman ṭhin a ni. Nimina Librarian's Day hmannaah hian zirna-in, sorkar department leh tlawmnngai pawlte library enkawltute an tel.