Assistant Director (F&D) dah loh hrethiam lo

MZP headquarters, Mamit chuan thuchhuah siamin, April 25, 2015-a Mamita Chief Medical Officer pisa aṭanga sawn chhuah, assistant director (Food & Drugs) Sarah Laldintluangi thlaktu tur tun thlenga dah a la ni lo chu hriatthiam har an tih thu an tarlang.

Mamita Health department Assistant Director (Food & Drugs) thlaktu awm loa sawn vang hian Mamit MZP-te leh tlawmngai pawl dangte chuan July 2015 khan lungawi lohna pawh an lo lantir tawh a; Mizoram sorkarin thla hnih chhungin Sarah Laldintluangi thlaktu tur dah a nih tur thu a puan avangin lungawi lohna lantir an titawp a ni.

Mamit MZP chuan, "Kum khat hnuah pawh Health department Assistant Director (F&D) dah a la ni lo hi pawi kan ti a, vanduaithlak kan ti hle. Khawthlang mipuite ngaihsak tâwk lohnaah kan ngai," an ti a; October 2016 chhung ngeia sorkarin a dah an beisei thu an puang.