Independence Day lawm a ni dawn

Vawiin August 15 hi India ram zalenna ni, Independence Day vawi 70-na a ni a, India rama state hrang hrangah leh Mizoram chhunga khaw hrang hrangah lawm a ni dawn.

Independence Day lawmna pui ber chu zing dar 9-ah Lammualah neih a ni dawn a, chief minister Lal Thanhawla'n hnam puanzar a pawt pharh ang.

I-Day lawmna-ah hian parade contingent 30 an tel dawn a; band party pathum, armed contingent paruk, un-armed contingent pasarih leh school contingent 14 an ni ang. Chawhma dar 11-ah Larsap Lt.Gen. Nirbhay Sharma chuan Raj Bhavan-ah thingpui ruai a buatsaih dawn a ni.

I-Day ah hian zing ni chhuah rualin sorkar in hrang hrangah hnam puanzar zàr tur a ni a; mimal inah pawh a remchan anga hnam puanzar zár turin sorkarin mipui a ngen bakah, sakhaw hrang hrang betute chu ram leh ram hruaitute tan
ṭawngṭai turin a ngen.

Independence Day hi district headquarters tinah te, SDO leh BDO ṭhut-hmun khuaahte lawm a ni dawn bawk a; minister, parliamentary secretary leh MLA-te'n an hmanpui ang.

Mizoram Synod chuan thuchhuah siamin, Mizoram sorkar ngenna angin I-Day pualin sorkar laipui, Mizoram sorkar hruaitute leh ram tana ṭawngṭai turin an kohhran mite a ngen a; ṭawngṭai rual hun chu mahni kohhranah a remchan dan anga hmang turin a hriattir a ni.

I-Day pual hian Synod Mission Board chuan vawiin chawhma dar 10:30
aṭanga tlai dar 5 thleng Millennium Centre kawtah I Day Food Festival 2016 an buatsaih dawn a, Governor chu khuallian a ni ang. He hunah hian zaipawl, live music, malzai leh hnam làmte entir an tum a ni.

VIP-te I-Day hmanna tur

VIP hminga Hmanna tur

Hiphei, Assembly Speaker Lunglei

R Lalzirliana, Cabinet Minister Kolasib

H Rohluna, Cabinet Minister Champhai

Zodintluanga, Cabinet Minister Lawngtlai

John Rotluangliana, Cabinet Minister Serchhip

PC Lalthanliana, Cabinet Minister Siaha

Lal Thanzara, Cabinet Minister Mamit

C Ngunlianchunga, Minister of State Tuipang

Dr BD Chakma, Minister of State Chawngte

KS Thanga, Parliamentary Secretary Hnahthial

H Zothangliana, Parliamentary Secretary Sangau

Lt.Col. ZS Zuala, Parliamentary Secretary Saitual

Hmingdailova Khiangte, Parliamentary Secretary Kawnpui

K Lalrinthanga, Parliamentary Secretary Vairengte

Joseph Lalhimpuia, Parliamentary Secretary Tlabung

RL Pianmawia, MLA Sakawrdai

Lalrobiaka, MLA West Phaileng

Vanlalawmpuii Chawngthu, MLA North Vanlaiphai

John Siamkunga, MLA Thenzawl

T Sangkunga, MLA Ngopa

Lalrinliana Sailo, MLA Khawzawl

R Vanlalvena, MLA Kawrthah