Japanese Encephalitis natna lakah Mizoram a la him
Health department chuan, Manipur-a Chu-rachanpur district-ah Japanese Encephalitis (JE) natna léng mek mah se, Mizoramah a la léng ve lo tih an puang.
Churachandpur district-ah JE natna a lên avangin Health department chuan Churachandpur district dep Mizoram chhunga khaw hrang hrang dinhmun enfiah turin August 9-11, 2016 chhung khan expert team a tir a; Sakawrdai leh a chhehvel khaw hrang hrang fangin an enfiah.
Expert team hi an vaiin mi 13 an ni a, IDSP-a state nodal officer Dr Pachuau Lalmalsawma'n a ho a; Sakawrdai khaw chhunga thosite manin uluk takin an zir chiang a; thosi hnawhbona khawl, fogging machine hmangin khaw chhunga thosi awm duhna lai turah an kâp nghal.
August 10 khan Sakawrdai community hall-ah vantlang inkhawm neiin, free clinic an nei nghal a; August 11-ah Ṭinghmun leh Vaitin khuaah vantlang inkhawm leh free clinic an nei bawk.
Free clinic-ah hian Sakawrdaiah mi 250, Ṭinghmunah mi 180 leh Vaitinah mi 90 an inentir a; Ṭinghmunah hian sikserh vei aphnih hmuhchhuah a ni.
Vantlang inkhawmah hian Dr Pachuau Lalmal-sawma leh Dr Zoram-muanan ten JE chungchang leh a awmzia an sawifiah a; state entomologist Lalfakzuala Pautu-in JE natna thlen theitu thosi chungchang leh mihringin a kai theih dante a sawi.
Dr Zorammuana chuan, JE natna chu vawk leh thosi inkara kal kual ṭhin a nih thu te, JE vei vawk sehtuin mihring a sehin a kai chhawn theih thu te, mihring leh mihringah inkai chhawn theih a nih loh thu te, a páwng a taka hlauh tur a nih loh thute a sawi a; Mizoramin JE enfiahna khawl a neih theih nana theihtawp chhuah a nih thu leh enfiahna hmanruate pawh a lo thlen tawh thu a sawi bawk.
Lalfakzuala Pautu chuan, tun dinhmunah Sakawrdai leh a chheh-velah JE natna a la awm loa an hriat thu a sawi a; mahse, Manipur ramri depa awm khuate chu state dang aṭanga hriat chian loh vawk lut ṭhin lakah an fimkhur a ngaih thu sawiin, "A thehdarhtu Culex thosite hi kan ramah an awm ve tho avangin JE hi darh hluai thei dinhmunah a ding tho a ni," a ti.
Expert team-te chuan, tunlaiin social media-ah JE natna vanga thi an awm anga thuthang dik lo thehdarh an awm chu pawi an tih thu an sawi a; thu dik lo thehdarh kawngah fimkhur turin mi tin an chah a ni.