KHAWTHLIR

Thisen pe

Inrinni khan Republic Vengthlang branch KṬP chuan Aizawl Civil Hospital tan unit 46 an pe a, a petute mipa 40 leh hmeichhia paruk an ni. Bethlehem North branch KṬP pawhin Synod Hospital tan thisen pein, mipa 33 leh hmeichhia parukin unit 39 an pe. Lunglei Rahsi Veng PYD-te chuan Lunglei Civil Hospital tan unit 22 an pe a, a petute mipa 18 leh hmeichhia pali an ni.

Cable TV enfiah

Mamit additional DC H Lianzela chuan, Inrinni zing khan Mamit khawpuia cable TV operator pahnih - RVS Cable Network leh LRS Vision-te a tlawh a; an control room-a kal chilhin, analog signal an pek chhuah leh pek chhuah loh a enfiah. Mamitah hian July 31, 2016 zanlai aṭangin analog signal tihtawp tawh tur a ni a, thupek hi cable TV operator-te chuan an zawm a ni.

Rûkrûk a hluar

Lunglei police-te chuan thuchhuah siamin, hun eng emaw chen aṭangin Lunglei khawpuiah in rawk leh rûkrûk a hluar tih an tarlang a, mipuite fimkhur turin an chah. Police-te chuan theihtawp chhuahin pawi khawihtute zawn chhuah hna an thawk tih sawiin, tun hnaiah thil ruk thubuai pariat Court-ah an thawn tih an tarlang bawk.

Current-in man

Remkunga, Lunglei College Veng chu August 12, 2016 chhun dar 12 vel khan Lunglei Bazar Venga Pandawngah electric current-in a man a, a hmunah a thi. Remkunga hi JB Cable Network-a thawk a ni a, electric current-in a man dan chiah hriat a ni lo.

UPC biak-in hawng

UPC (North East India) College Veng biak-in thar chu Inrinni khan UPC Aizawl East district superintendent Rev. Rosanga Kawlni-in a hawng. Biak-in hi Rs. nuai 36 vel sênga sak a ni a, hnatlang thâ 700 chuang sen a ni. A dung ft. 45 leh a vâng ft. 32-a liana sak a ni.

Traffic awareness

Lunglei SP Zosang-liana leh a thawhpuite chuan, Inrinni khan Baptist Higher Secondary School-ah 'Traffic Awareness Programme' an hmang a; zirlai 900 chuang hmaah lirthei khalhtute tana hriat tur pawimawhte an zirtir. Police Headquarters thupek angin, Lungleiah hian traffic awareness programme hi college leh sikul hrang hrangah neih ṭhin a ni.

Missionary tir

Nimin Pathianni chawhnu khan, Zarkawt Presbyterian Kohhran biak-inah Mizoram Synod chuan missionary tirh chhuahna inkhawm an hmang. Inkhawm hi Synod executive secretary Rev. B Sangthanga'n a kaihruai a; Synod Mission Board coordinator Dr Robert S Halliday-a'n inhmelhriattirna hun hmangin, moderator Rev. H Lalrinmawia'n missionary-te tirh chhuahna hun a nei.

Khawlai thianfai

Thenzawla Bethlehem Baptist Kohhran Mipa Pawl (BMP)-te chuan, Inrinni khan Thenzawl khaw chhunga vantlang hmun pawimawh laite thenfai hnatlang an nei. Hnatlangah hian mi
ṭhahnem tak an thawk chhuak a; bazar, vantlang inthiarna hmun leh khawlai lûn laite an tifai a ni.

NLUP sem

Serchhipa Soil & Water Conservation department chuan, Inrinni khan Bungtlang BNRGSK Hall-ah hmunphiah thlangtute hnenah NLUP third phase leh fourth phase hnuaiah
ṭanpuina sum an sem a, MLA Vanlal-awmpuii Chawngthu-in a hmanpui. Ṭanpuina hi mi 10 hnenah Rs. 51,400 pek a ni.