Scholarship dilnaah Aadhar card ngai rih lo

August 12, 2016 khan New Delhi-ah National Scholarship Portal-II chungchangah India ram puma scholarship khawihtute an inhmukhawm a; Mizoram Scholarship Board (MSB) aṭangin secretary JH Zoremthanga leh officer dangte ngenna avangin, scholarship dilnaah Aadhaar card telh ngei tura tih chu Mizoram tan bik âwl (exempt) rih a ni dawn.

Meeting-ah hian MSB hotute chuan zirlaite'n scholarship an dilnaa Aadhaar card copy thil tel ngei ngei ngai a ni chu Mizoram tan a la harsat thu an thlen a; Mizoramah Aadhaar card nei an la tlem thu te, scholarship dilnaah Aadhaar card telh ngei a ngaih chuan Mizoramah zirlai dil thei tur an tlem thute an sawi.

MSB-te thu thlen leh ngenna hi Ministry of Minority hotute chuan ngai pawimawhin, Mizoram tan bik kum 2016 chhung atan scholarship dilnaah Aadhaar card ngai loin zirlaite'n scholarship an dil a phalsak nia thu dawn a ni.

Hemi chungchangah hian MZP chuan lawmawm an tih thu an tarlang a; chief minister Lal Thanhawla leh MSB hotute hmalakna vanga kumin chhung bik atana Mizo zirlaite'n scholarship an dilnaah Aadhaar card telh a ngai lo tur chu an lawm thu an sawi. "Ministry of Minority leh Mizoram sorkar chungah kan lawm a, nasa taka hma latu MSB secretary JH Zoremthanga leh a thawhpuite chunga lawmthu kan sawi a ni," an ti.