Bairabi-ah ILP endik uluk turin sorkar phût

ZNP ṭhalai president Lalmuan-puia Punte chuan, Mizoram sorkar chu ram leh hnam himna tak tak ngaihtuah loah a puh a, Bairabi-a Inner Line Permit (ILP) enfiahna tura siam chu a nih dan tur ang taka kalpui turin sorkar a phût.

Lalmuanpuia Punte hian Inrinni khan Aizawl Press Club-ah thuthar thehdarhtute kâwmin, Bairabi rel chawlhhmunah ILP en-dikna tur checkgate siam a nih loh avangin hnam dang eng emaw zat Mizoramah an lût tih an hmuhchhuah thu a sawi. ZNP ṭhalaite chuan Bairabi hi July thlaah leh August 9 khan an enfiah tawh a ni.

ZNP ṭhalai President chuan, August 5, 2016-a Bairabi rel chawlh-hmuna ILP enfiahna siam tawh an enfiahnaah, rêl hmanga hnam dang rawn lutte police-in ILP an neih leh neih loh an endik lo niin a sawi a, "Rel station-a Mizoram sorkarin ILP counter a siamah hian hawn a nih aṭanga 9.8.2016 zan thleng khan hnam dang Mizoram lo lut tumah ILP dil an la awm lo a, ILP an la issue lo. ILP counter-ah Bairabi SDC staff hmeichhe pahnih an duty a, ILP check hi an hna a ni lo a, ILP dil an awma issue chauh an hna a ni," a ti.

Rêl cawlhhmun sirah wheelchair hmangte kalna tur bika siam kawng hran a awm a, mahse vên a nih loh avangin ILP nei lote’n chhuah rûkna atan an hmang thei nia sawiin, Lalmuanpuia chuan, "Kan hmuh lai ngei pawhin main gate-a chhuak loa he kawnga chhuak hnam dang pahnih kan hmu," a ti a; ILP counter siam chu Mizo mipui laka hmai phih fai tumna ang chauh nia an hriat thu a sawi bawk.